Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 156 Hüküm no: 174 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Ali’nin Beşiktaş’taki bağını Saime Hatun’a sattığı Mahmiye-i Galata’ya tâbi‘ kasaba-i Tophane mahallâtından Selime Hatun mahallesi sâkinlerinden Mustafa Çelebi b. Ali nâm kimesne mahfil-i kazâda işbu râfi‘atü’l-kitâb Sâime nâm hatun tarafından nehc-i şer‘î üzere vekîl olan babası eş-Şeyh Fazlı Dede b. Bâli mahzarında bi-tav‘ihî ikrâr ve takrîr-i kelâm edüp mahmiye-i mezbûre tevâbi‘inden kasaba-i Beşiktaş bağları sınırı dâhilinde Ayazma nâm mevzi‘de vâki‘ bir tarafı kendi bağım ve bir tarafı Naccar? Mustafa bağı ve bir tarafı Ekmekçi nâm zimmî bağı ve bir tarafı bazen Nakkāş nâm zimmî bağı ve bazen Berber Mustafa bağı ile mahdûd Bayır ta‘bîr olunur mezbûr Berber Mustafa ile beynimizde tarîki müşterek olan bir kıt‘a mülk bağımı müvekkile-i mezbûre Sâime Hatun’a otuz beş kıt‘a riyâlî guruşa tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mârrü’z-zikr otuz beş kıta guruşu müvekkile-i mezbûre yedinden bi-tamâmihî alıp kabz eyledim ba‘de’l-yevm zikr olunan bağ mersûme Sâime Hatun’un mülk-i müşterâsıdır keyfe mâ teşâ ve tehtâr mutasarrıfe olsun dedikde mukırr-ı mezbûr Mustafa Çelebi’nin vech-i muharrer üzere cârî ve sâdır olan ikrârını vekîl-i mezbûr Fazlı Efendi vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Yusuf Efendi el-kādı, Mehmed Çelebi b. Abdullah, Emin Dede b. Abdullah, Mehmed Çelebi b. Mustafa, Ali Çelebi b. Abdullah.