Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 156 Hüküm no: 175 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakalanan Rus asıllı köle Yusuf’un efendisi belli oluncaya kadar subaşıya teslimi ve kendisine nafaka tayini Mahmiye-i Galata’ya tâbi‘ kasaba-i Beşiktaş’da bi’l-fi‘il subaşı ve abd-i avâbık zâbiti olan Ali Bey b. Mustafa mahfil-i kazâda işbu çatık kaşlı sarı elâ gözlü ve kıvrık burunlu Rusiyyü’l-asl Yusuf b. Abdullah nâm gulâmı ihzâr ve muvâcehesinde takrîr-i kelâm edüp gulâm-ı mezbûru kasaba-i merkūmede Sultân Süleyman mahallesinde Mahmud nâm [52b] kimesne ahz edüp bana teslîm eyledi suâl olunup rıkk u ibâkına i‘tirâfından sonra mevlâsı zâhir veya müddet-i örfiyyesi tamâm olunca bana teslîm olunup ve nafaka takdîr olunması matlûbumdur dedikde gulâm-ı mezbûr istintâk olundukda cevâbında mahmiye-i İstanbul’da Yemiş İskelesi kurbünde saraç tâifesinden Yusuf nâm kimesnenin abd-i memlûkü olup mevlâm mezbûr Yusuf beni her vakit darb eylemek ile firâr eyledim deyü rıkk u ibâkına mu‘terif olmağın gulâm-ı merkūmun mevlâsı zâhir olunca merkūm Ali Bey’e teslîm olunup ve nafakası’çün yevmî altışar akçe farz ve takdîr olundu. Tahrîren fi’l-yevmi’l-âşir min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mustafa Beşe b. Mehmed, Mehmed Beşe b. Ramazan, Ahmed Çelebi b. Receb, Cafer Beşe b. Mehmed, Mehmed Çelebi b. Mahmud.