Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 157 Hüküm no: 177 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanoç v. Andreya’nın Arnavutköy’deki bağını Yani v. Hristodora’ya sattığı Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sâkinlerinden Yanoç v. Andreya nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr Yani v. Hıristodora nâm zimmî muvâcehesinde ikrâr ve takrîr-i kelâm edüp karye-i mezbûre bağlar sınırı dâhilinde Ayazma nâm mevzi‘de vâki‘ bir tarafı Arslan Reis bağı ve bir tarafı Bozacı nâm zimmî bağı ve iki tarafı tarîk-i âm ile mahdûd tahmînen altı dönüm mikdârı mülk bağımı merkūm Yani’ye yüz kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm [53a] eyledikden sonra semeni olan meblağ-ı mârrü’z-zikr yüz kıt‘a riyâlî guruşu merkūm Yani yedinden tamâmen alıp kabz eyledim ba‘de’l-yevm zikr olunan bağ mersûm Yani’nin mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Yanoç’un vech-i muharrer üzere cârî ve sâdır olan ikrârını el-mukarru lehü’l-merkūm Yani bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mahmud Çelebi b. Mehmed, Abdulbâki Çelebi b. Derviş, Yusuf Bey b. Abdullah, Mehmed Beşe b. Abdullah, İlyas Beşe b. İbrahim, Mustafa Beşe b. Mehmed, İstirati v. Andreya, Lenberyo v. Andreya, Androni v. Yani, Nikola v. Kiryako, Eremi Reîs v. İksenita, Apostol v. Mano, Yani v. Yanoç, Yorgo v. Dimitri ve gayruhüm.