.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 177
Hüküm no: 132
Orijinal metin no: [36a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Küçük İbrahim oğlu Dideban Mehmed’in vefat eden Camcı Mustafa’nın varislerinden miras talebi

Arz-ı dâ‘î-i Devlet-i aliyyeleridir ki

Mübârek Rikâb-ı kamer-tâb-ı mülûkâneye takdîm olunan arzuhâlde mezkûrü’l-ism olup medîne-i Üsküdar’da Rum Mehmed Paşa mahallesinde sâkin iken işbu sene-i mübâreke şehr-i Rebî‘ülevveli gurresinde vefât eden Camcı el-Hâc Mustafa’nın li-ebeveyn ammi müteveffâ Küçük İbrahim’in sulbî oğlu Dîdebân Mehmed sâdır olan fermân-ı âlîlerine imtisâlen Salı günü huzûr-ı hazret-i fetvâ-penâhîde ma‘kūd meclis-i şer‘-i enverde müteveffâ-yı mezbûrun veresesinden zevce-i menkûha-i metrûkesi olup terekesine bi’l-verâse vaz‘-ı yedi mütehakkık olan mu‘arrefetü’z-zât Hamide bt. Ali nâm hatun kendi nefsinden asâleten ve müteveffâ-yı mezbûrun sulbiye sagīre kızı olup kendüden mütevellide Emine’nin tesviye-i umûruna kıbel-i şer‘den vasiyy-i mansûbesi olmağla vesâyeten muvâcehesinde müteveffâ-yı merkūmun li-ebeveyn er karındaşı müteveffâ Mehmed’in sulbî oğlu müteveffâ Ömer’in kebîr oğulları ve usûbet-i nesebiye cihetinden vârisleri olduklarına ber-vech-i âtî hükm-i şer‘î lâhık olan Mehmed İzzet ve Mehmed Nazif nâm kimesnelerin üvey pederleri ve taraflarından husûs-ı câi’z-zikirde vekîl-i müseccel-i şer‘îleri eşrâf-ı kuzâtdan es-Seyyid el-Hâc İsmail Efendi b. Ahmed hâzır olduğu hâlde babam müteveffâ-yı mezbûr Küçük İbrahim müteveffâ-yı merkūm Camcı el-Hâc Mustafa’nın babası müteveffâ Kalaycı Salih ile li-ebeveyn er karındaşlar olup babaları ismi Hasan ve dedeleri ismi Ömer ve vâlideleri ismi Zeyneb bt. Abdullah ve maskat-ı re’sleri medîne-i merkūmede vâki‘ Debbâğlar Meydanı nâm mahâlde Köpekçiler Hanı olup ol vechile ben müteveffâ-yı mezbûrun li-ebeveyn ammi oğlu olmamla verâseti zevcesi mezbûre Hamide Hatun ile sulbiye sagīre kızı merkūme Emine’ye usûbet-i nesebiye cihetinden bana münhasıra olup bizden gayrı vâris ve terekesine müstahakk-ı âharı yoğiken müvekkilân-ı mezbûrân Mehmed İzzet ve Mehmed Nazif vekîl-i merkūmun yedinde olup işbu sene-i mübâreke Cemâziyelûlâsı’nın on beşinci günü târîhiyle müverrah ve sâbık Sadr-ı Anadolu devletlü inâyetlü Yesârî Efendizâde Mustafa İzzet Efendi hazretlerinin hatemleriyle mahtûm bir kıt‘a i‘lâm-ı şer‘î nâtık olduğu üzere kazasker-i müşârün-ileyh hazretleri huzûrunda zevce-i merkūme Hamide Hatun muvâcehesinde babamız müteveffâ-yı mezbûr Ömer’in babası müteveffâ-yı merkūm Mehmed müteveffâ-yı mezbûr Camcı el-Hâc Mustafa ile li-ebeveyn er karındaşlar olup babaları ismi Kalaycı Salih ve dedeleri ismi Ali ve vâlideleri ismi Âişe bt. Ahmed ve maskat-ı re’sleri medîne-i mezkûre mahâllâtından Atîk Vâlide Sultan mahallesi olup ol vechile müteveffâ-yı mezbûrun li-ebeveyn er karındaşı oğlunun oğulları olmamızla verâseti zevce-i mezbûre Hamide Hatun ile sulbiye sagīre kızı merkūme Emine’ye ve usûbet-i nesebiye cihetinden [36b] bize münhasıra olup bizden gayrı verâset ve terekesine müstahakk-ı âharı yoğiken zevce-i merkūme Hamide Hatun müteveffâ-yı mezbûrun ber-mûceb-i defter-i kassâm terekesinin mecmû‘unu bi’l-verâse ve bi’l-vesâye kabz ve vaz‘-ı yed etmekle makbûzundan hisse-i irsiyemizi bize teslîme zevce-i mezbûre Hamide Hatun’a tenbîh olunmak matlûbumuzdur deyü zevce-i mezbûrenin inkârına mukārin eyledikleri müdde‘âlarını medîne-i mezbûre mahâllâtından Sinan Paşa mahallesi İmamı es-Seyyid Hafız Hüseyin Efendi b. es-Seyyid Ali ve Kefçe Dede mahallesi ahâlîsinden Kahveci Abdi Ağa b. el-Hâc Mehmed nâm kimesne şehâdetleriyle ber-nehc-i şer‘î isbât etmeleriyle Kazasker-i müşârün-ileyh hazretleri dahi şâhidân-ı merkūmânı ba‘de’t-ta‘dîl ve’t-tezkiye şehâdetlerini kabûl ve mûcebince müvekkilân-ı merkūmân Mehmed İzzet ve Mehmed Nazif’in verâsetlerine hükm buyurmuşlar idi. El-hâletü hâzihî müvekkilân-ı merkūmân tereke-i müteveffâ-yı mezbûrdan olarak zevce-i merkūmeden henüz kat‘an nesne kabz etmeyip hakīkatinde müvekkilân-ı merkūmân Mehmed İzzet ve Mehmed Nazif müteveffâ-yı mezbûrun li-ebeveyn er karındaşı oğlunun oğulları ve vârisleri olmayıp zî-rahm cihetinden li-ebeveyn hâlı müteveffâ-yı merkūm Ömer’in oğulları olmalarıyla ber-vech-i meşrûh isbât eyledikleri müdde‘âları hilâf-ı vâki‘ olup ve şâhidân-ı merkūmân dahi şâhid-i zûr olmalarıyla öyle olucak ber-minvâl-i muharrer makbûzundan hisse-i irsiyemi bana teslîme zevce-i merkūme Hamide Hatun’a tenbîh olunmak matlûbumdur deyü takrîr-i meşrûhu üzere müvekkilân-ı mezbûrânın ber-minvâl-i meşrûh verâsetlerine ba‘de’l-hükm tasaddî eyledikleri da‘vâsı mesmû‘a ve iltifâta şâyân olmadığı kendüye tefhîm ve da‘vâ-yı mezkûresiyle zevce-i asîl ve vasiyy-i merkūme Hamide Hatun ile müvekkilân-ı mezbûrâna bî-vech-i şer‘î mu‘ârazadan men‘ olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr.

Fî 17 Za sene [1]256.