.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 179
Hüküm no: 133
Orijinal metin no: [36b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hatice bt. Abdullah’ın Kantarcı Mehmed Ağa aleyhindeki alacak iddiasında anlaşma sağlanması

Ma‘rûz-ı dâ‘î-i Devlet-i aliyyeleridir ki,

Medîne-i Üsküdar’da Arakiyeci mahallesinde sâkine sâhibe-i arzuhâl mu‘arrefetü’z-zât Hadice Hatun bt. Abdullah Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde derûn-ı arzuhâlde mezkûrü’l-ism Kantarcı Mehmed Ağa b. Hasan b. Abdullah tarafından ber-vech-i âtî husûsda tasdîka vekîl-i şer‘îsi el-Hâc Ali b. el-Hâc Ali nâm kimesne muvâcehesinde müvekkil-i merkūm Mehmed Ağa zimmetinde cihet-i deyn-i şer‘îden dokuz yüz guruş alacak hakkım olmağla meblağ-ı mezkûru müvekkil-i merkūm Mehmed Ağa’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn müvekkil-i merkūm Mehmed Ağa ile bi’t-tav‘ ve’r-rızâ üç yüz guruş bedel-i medfû‘ ve makbûza sulh olduğumda ol dahi sulh-ı mezkûru ba‘de’l-kabûl ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan müvekkil-i merkūm ile vekîl-i mezbûrun zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde mezbûr el-Hâc Ali Ağa dahi bi’l-asâle ve bi’l-vekâle ibrâ-i mezkûrumu kabûl eyledi deyü mukırra-i müdde‘iyye-i merkūme Hadice Hatun’u bi’l-cümle sâdır olan kelimât-ı meşrûhasında vekîl-i merkūm el-Hâc Ali’nin tasdîk eylediği tescîl ve huzûr-ı âlîlerine i‘lâm olundu. El-emru li-men-lehü’l-emr.

Fî 4 Z sene [1]256.