Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 167 Hüküm no: 191 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohri Sancağı’ndan bazı zimmilerin kendilerinden haksız yere para aldığını iddia ettikleri Çernidol köyü zabiti Ramazan Bey b. Abdülmennan ile sulh oldukları Vilâyet-i Rumeli’nde Ohri Sancağı’nda Ustrova (Ostrova) kazâsı tevâbi‘inden Şeşteple nâm karye sâkinlerinden Ali b. Hüseyin ve Hüseyin b. Ali nâm kimesneler Hayle v. Kolya ve Kolya v. Duka nâm zimmîler ve yine kazâ-i mezbûreye tâbi‘ Çernidol nâm karye sâkinlerinden Kuka ve Kefe ve Gedik v. Dimo nâm zimmîler bi-ecma‘ihim meclis-i şer‘-i hatîr-i lâzımü’t-tevkīrde sâbıkā zikr olunan sancağa mutasarrıf olan Ömer Paşa hazretlerinin kethüdâsı olup ve mârrü’z-zikr karyelerde zâbit olan işbu sâhibü’l-kitâb fahrü’l-akrân Ramazan Bey b. Abdülmennan nâm kimesne mahzarında herbiri ikrâr ve takrîr-i kelâm edüp mezbûr Ramazan Bey sâlifü’z-zikr karyelerde zâbit iken zikr olunan Çernidol nâm karye ahâlîsinin siz koyunlarını basdınız deyü bi-gayrı vech-i şer‘î bizim yetmiş bir guruşumuzu alıp biz dahi meblağ-ı mezkûru da‘vâ ve taleb eylediğimizde beynimizde münâza‘ât-ı kesîre vâkı‘a olmuş idi el-hâletü hâzihî beynimize muslihûn tavassut edüp “es-sulhu hayrun” mefhûmunca bizi yirmi riyâlî guruş üzerine inşâ-yı akd-i sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezkûr yirmi guruşu herbirimiz mezbûr Ramazan Bey yedinden alıp kabz edüp husûs-ı mezbûra müte‘allik merkūme Ramazan Bey’in cemî‘ de‘âvîden zimmetini ibrâ ve ıskāt eyledik ba‘de’l-yevm mazmûn-ı kitâba muhâlif herbirimizden veyâhud vekîlimizden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Osman Çavuş b. Ahmed, Mustafa b. Mehmed, Mehmed Çelebi b. Mustafa, Mahmud beşe b. Şaban, Mehmed Çelebi b. Mahmud, Ömer Çelebi b. Mehmed, Terzi Mehmed b. Abdullah, Yahya Çelebi b. Hasan, Mustafa b. Mehmed, Mehmed b. Ramazan muhzır.