Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 168 Hüküm no: 192 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali’nin mehir ve nafaka hususunda boşandığı kocası Ahmed Bey b. Mehmed’in zimmetini ibra ettiği Mahmiye-i Galata’ya tâbi‘ kasaba-i Tophane mahallâtından Defterdâr mahallesi sâkinelerinden Emine bt. Ali nâm hatun mahfil-i kazâda zevc-i mutallıkı işbu sâhibü’l-kitâb Ahmed Bey b. Mehmed nâm kimesne mahzarında bi-tav‘ihâ ikrâr ve takrîr-i kelâm edüp bundan akdem mezbûr Ahmed Bey zevcim olup talâk-ı bâyin ile beni tatlîk etmeğin zimmetinde mütekarrir olan dört bin akçe mehr-i mü’eccel hakkımı mezbûr Ahmed Bey [59b] yedinden tamâmen alıp kabz edüp nafaka-i iddet-i ma‘lûme ve me’ûnet-i süknâmdan ferâgat edüp ve zevciyyete müte‘allik cemî‘ de‘âvîden mezbûr Ahmed Bey’in zimmetini ibrâ ve ıskāt eyledim ba‘de’l-yevm mezbûr Ahmed Bey ile husûs-ı mezbûra müte‘allik da‘vâ ve nizâ‘ım yokdur dedikde mukırre-i mezbûre Emine Hatun’un vech-i muharrer üzere cârî ve sâdır olan ikrârını el-mukarru lehü’l-merkūm Ahmed Bey bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mustafa Çelebi el-yesârî, el-Hâc Yusuf [b.] Abdullah, Halil Çelebi b. Hüseyin, Murad Çelebi b. Mehmed, Ahmed Çelebi b. Ali, el-Hâc Mustafa b. Yakub, Mustafa Çelebi b. Ahmed, Ömer Çelebi b. İbrahim, Mehmed Çelebi b. Memi, Ahmed Bey el-cündi, Mehmed Çelebi b. Ebûbekir, Mehmed Çelebi b. Hasan, Yusuf Bey muhtesib, Kadri Çelebi muhzır.