.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 180
Hüküm no: 134
Orijinal metin no: [37a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hasan Tahsin’in hak iddia ettiği İzzeddinli mezraası tımarının İmam Ahmed ve kardeşi Veliyyüddin’e ait olduğu

Ma‘rûz,

Anadolu’da Kengiri sancağında Keskin nâhiyesinde Efsun nâm-ı diğer Oşunlu karyesi timârına bâ-berât-ı âlîşân mutasarrıf olan Defterhâne-i âmire ketebesinden derûn-ı arzuhâlde mezkûrü’l-ism es-Seyyid Hasan Tahsin Efendi b. Mustafa Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde yine nâhiye-i mezkûrede Yassıbağ timârına bâ-berât-ı âlîşân iştirâken mutasarrıflar olan Asâkir-i Hâssa-i Şâhâne süvârîlerinden Rıza Paşa livâsında Üçüncü Alayın İmamı Kengirili Ahmed Efendi ve karındaşı Veliyyüddin ibney Mehmed’den sâhib-i arzuhâl, mezbûr İmam Ahmed Efendi muvâcehesinde zikr olunan Keskin nâhiyesinde vâki‘ Alempınarı ve Eskikışla ve Kızılcapınar ve Acemseküsü ve Küçükburun ve Dölek Kuzuboğan Habil Pınarı, Yanıkviran ve Akçagedik ve tarîk-i âm ile Baştarla, Köygösteren, Kartalkaya, Çamlıca, İncekiriş, Gökçeburun ile mahdûd ve İzzeddinli karyesi mezra‘ası benim bâ-berât mutasarrıf olduğum Efsun nâm-ı diğer Oşunlu karyesi timârı mülhakātından iken mezbûr İmam Ahmed Efendi ile karındaşı ve müştereki mezbûr Veliyyüddin mahâll-i mezkûr bizim bâ-berât mutasarrıf olduğumuz Yassıbağ timârı mülhakātındandır deyü bi-gayr-ı hakkın zabt ve hâsılâtını ahz u kabz ederler, suâl olunup keff-i yedleri murâdımdır deyü da‘vâ etdikde mezbûr İmam Ahmed Efendi dahi cevâbında yedimde olup bin iki yüz elli iki senesi Cemâziyelâhiresi’nin on dördüncü günü târîhiyle müverrah Rumeli Kazaskeri esbak devletlü inâyetlü Arabzâde Mehmed Hamdullah Efendi hazretlerinin hatemleriyle mahtûm bir kıt‘a i‘lâm-ı şer‘î nâtık olduğu üzere Kazasker-i müşârün-ileyh hazretleri huzûrunda müdde‘î-i merkūm es-Seyyid Hasan Tahsin Efendi husûs-ı mezkûru bi-aynihî benim muvâcehemde da‘vâ ve ben dahi bin iki yüz otuz dokuz senesi şehr-i Rebî‘ülevveli’nin on beşinci günü târîhiyle müverrahalar sâbıkā Kengiri nâibi Kādızâde es-Seyyid Mustafa Edib Efendi’nin mührü mutâbık diğer yedimde olan bir kıt‘a hüccet ve bir kıt‘a i‘lâm-ı şer‘î nâtık oldukları üzere zikr olunan Oşunlu karyesi timârına Defterhâne-i âmire ketebesinden es-Seyyid Mustafa ve karındaşı es-Seyyid İbrahim Efendiler ibneyi’l-Mustafa târîh-i mezkûrda bâ-berât iştirâken mutasarrıflar ve benimle karındaşım mezbûr Veliyyüddin’den her birimiz dahi ol târîhde hâl-i sugrumuzda sâlifü’z-zikr Yassıbağ timârına bâ-berât iştirâken mutasarrıflar iken nâib-i mezbûr tarafından mürsel es-Seyyid Hafız Mehmed Efendi’nin münâza‘un-fîh olan mezra‘a-i mezkûre üzerine varıp huzûr-ı Müslimînde akdeylediği meclis-i şer‘de kâtibân-ı merkūmândan merkūm es-Seyyid Mustafa Efendi hudûd-ı mezkûr ile mahdûd İzzeddinli mezra‘ası karındaşım ve müşterekim mezbûr es-Seyyid İbrahim Efendi ile bâ-berât iştirâken mutasarrıflar olduğumuz Oşunlu timârı mülhakātından olmağla keff-i yedi murâdımdır deyü min-ciheti’l-eb ceddimiz ve vasîmiz Veliyyüddin b. Abdullah’ın muvâcehesinde da‘vâ etdikde ceddimiz ve vasîmiz mezbûr Veliyyüddin dahi mezra‘a-i mezkûre ber-mûceb-i Defter-i hâkānî bizim bâ-berât mutasarrıf olduğumuz mezra‘a-i Yassıbağ timârı mülhakātından olduğunu hüccet-i mezkûrede isimleri mastûr on üç nefer şuhûd-ı mu‘addilûn şehâdetleriyle bi’l-muvâcehe ber-nehc-i şer‘î isbât edip mûcebince müdde‘î-i mezbûr Mustafa Efendi da‘vâ-yı mezkûresiyle ceddimiz ve vasîmiz mezbûr Veliyyüddin’e bî-vech-i şer‘î mu‘ârazadan men‘ olunmuşdur deyü mazmûnları takrîr-i meşrûhuma mutâbık hüccet ve i‘lâm-ı mezkûrları ibrâz ile eylediğim def‘imi ve mazmûn-ı hüccet ve i‘lâm-ı mezkûrları merkūm es-Seyyid Hasan Tahsin Efendi ikrâr ü i‘tirâf edip lâkin zikr olunan Oşunlu karyesi mutasarrıfân-ı kâtibân-ı mezbûrân es-Seyyid Mustafa ve es-Seyyid İbrahim Efendilerin terk-i hizmetlerinden bâ-berât bana tevcîh olunmağla öyle olucak mârrü’l-beyân İzzeddinli mezra‘ası mezbûr İmam Ahmed Efendi ile karındaşı merkūm Veliyyüdin’in bâ-berât mutasarrıf oldukları mezra‘a-i Yassıbağ timârı mülhakātından olduğunu mahâllinde benim muvâcehemde dahi isbât etsinler deyü îrâd eylediği kelâmı meşrû‘a ve iltifâta şâyân olmadığı mezbûr es-Seyyid Hasan Tahsin Efendi’ye tefhîm ve mûcebince da‘vâ-yı mezkûresiyle bana bî-vech-i şer‘î mu‘ârazadan ba‘de’l-men‘ sâlifü’z-zikr İzzeddinli mezra‘ası timârı ber-mûceb-i Defter-i hâkānî mezra‘a-i Yassıbağ timârı mülhakātından olmak üzere benimle karındaşım mezbûr Veliyyüddin’in bâ-berât zabt ve tasarrufumuz iktizâ eylediği i‘lâm-ı kazasker-i müşârün-ileyhde tasrîh olunmuş iken merkūm es-Seyyid Hasan Tahsin Efendi mücâb ve mülzem olmayıp husûs-ı mezkûrun mahâllinde lede’t-tahkīki’ş-şer‘î fasl ü rü’yet olunması bâbında mârru’z-zikr Kengiri ve nâhiye-i mezkûr nâibleri efendilere hitâben bir kıt‘a emr-i âlîşân ısdârıyla tarafeynden vekîl nasb u ta‘yîn eylediği gāib ani’l-beled Karahisârî Hüseyin b. Hüseyin nâm kimesne târîh-i merkūmda zikr olunan Kengiri Nâibi Ali Şakir Efendi tarafından meb‘ûs Hafız Hüseyin Efendi’nin yine münâza‘un-fîh olan mahâll-i mezkûre varıp nâhiye-i [37b] mezbûre nâibi efendi ile ma‘an huzûr-ı Müslimînde akdeyledikleri meclis-i şer‘de işbu İzzeddinli Aşîreti’nin zirâ‘at ve hırâset etdikleri mezra‘anın nâm-ı kadîmi Efsun olup İzzeddinli Aşîreti sonra gelip tavattun ile mezra‘a-i mezkûreyi zirâ‘at ve hırâset ederler ise de yine? hâsılâtına müvekkilim es-Seyyid Hasan Tahsin Efendi’nin ahz u kabz etmesi lâzım gelmekle keff-i yedleri murâdımdır deyü kendi nefsimden asîl ve karındaşım mezbûr Veliyyüddin tarafından vekîl olduğum hâlde bi’l-vekâle muvâcehemde da‘vâ etdikde ben dahi ber-minvâl-i meşrûh da‘vâ-yı def‘ ve def‘-i mezkûrumu mazbûtü’l-esâmî şuhûd-ı udûlle bi’l-muvâcehe ber-nehc-i şer‘î isbât edip mûcebince müdde‘î-i müvekkil-i mezbûr es-Seyyid Hasan Tahsin Efendi’ye izâfetle vekîl-i mezbûr Hüseyin da‘vâ-yı mezkûresiyle tekrâr bana bî-vech-i şer‘î mu‘ârazadan men‘ olunmuş idi deyü mazmûnları takrîrine mutâbık ve nâib-i merkūm Ali Şakir Efendi’nin mührü mutâbık âhar bir kıt‘a hüccet ve iki kıt‘a i‘lâm-ı şer‘îler ile bâlâda bast ü beyân olunduğu üzere mukaddem ve muahhar senedât-ı merkūmeyi ibrâz ile eylediği def‘ini ve bi’l-cümle senedât-ı mezkûrenin mazmûnlarını müdde‘î-i mezbûr es-Seyyid Hasan Tahsin Efendi bi-tamâmihâ ikrâr ü i‘tirâf edip lâkin mezbûr İmam Ahmed Efendi husûs-ı mezkûru benim muvâcehemde isbât etmeyip vekîlim olan gāib-i mezbûr Hüseyin’in muvâcehesinde isbât etdiğinden ben bir vechile kāni‘ ve mücâb olmamamla öyle olucak merkūm İmam Ahmed Efendi ile karındaşı gāib-i merkūm Veliyyüddin’den her biri husûs-ı mezkûr mahâllinde def‘e dahi bi’n-nefs benim muvâcehemde isbât etsinler demesi mesmû‘a ve iltifâta şâyân olmadığı kendüye tefhîm ve mûcebince müdde‘î-i mezbûr es-Seyyid Hasan Tahsin Efendi da‘vâ-yı mezkûresiyle mezbûr İmam Ahmed Efendi’ye ke’l-evvel bî-vech-i şer‘î mu‘ârazadan ba‘de’l-men‘ sâlifü’l-beyân İzzeddinli mezra‘ası ber-mûceb-i Defter-i hâkānî Mezra‘a-i Yassıbağ timârı mülhakātından olmak üzere mezbûrân İmâm Ahmed Efendi ve karındaşı Veliyyüddin’in bâ-berât-ı âlîşân zabt ve tasarrufları iktizâ etmeğin bu sûretde mezbûr İmâm Ahmed Efendi ile karındaşı mezbûr Veliyyüddin’in sâbıku’z-zikr İzzeddinli mezra‘asını ber-minvâl-i meşrûh zabt ve tasarrufları için sûret-i mürâfa‘aları derciyle bâlâsı tuğrâ-yı garrâ-yı cihân-bânî ile müveşşah bir kıt‘a emr-i âlîşân ısdârı re’yi- savâb idüğü huzûr-ı âlîlerine i‘lâm olundu. El-emru li-men-lehü’l-emr.

Fî 26 L sene [12]56.