Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 173 Hüküm no: 201 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Dimitri’nin Hüseyin b. Musa’ya küfrettiğinin şahitlerle ispat olunduğu Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden işbu râfi‘ü’l-kitâb Hüseyin b. Musa nâm kimesne mahfil-i kazâda Panayot v. Dimitri nâm zimmî muvâcehesinde üzerine da‘vâ ve takrîr-i kelâm edüp mezbûr Panayot bana şimdi senin sakalın keserim deyü avretime zinâ lafzıyla şetm eylemişdir suâl olunup mûcib-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan da‘vâsına mutâbık beyyine taleb olundukda udûl-i ricâlden olup [62b] mahalle-i mezbûre sâkinlerinden Mustafa Bey b. Hasan ve Abdulbâki b. Memi nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Panayot bizim huzûrumuzda müdde‘î-i merkūm Hüseyin’e şimdi senin sakalın keserim deyü avretine zinâ lafzıyla şetm eyledi biz bu husûsa bu minvâl üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mâ-vaka‘a bi’t-taleb ketb olundu. Tahrîren fi’l-yevmi’s-sânî min-Ramazâni’l-mübârek li-sene isneteyn ve sittîn ve elf. Şühûdü’l-hâl: İbrahim Çelebi b. Ali, Receb Beşe b. Muharrem, Ali Beşe b. İbrahim, Mehmed b. Abdullah, Mustafa Beşe b. Mehmed.