Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 174 Hüküm no: 202 Orijinal metin no: [62b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Reis b. Himmet’in Şenlik Dede Vakfı’ndan bey‘ bi’l-istiğlâl yoluyla ödünç para aldığı Mahmiye-i Galata tevâbi‘inden kasaba-i Beşiktaş mahallâtından Maçuka mahallesinde sâkin Receb Reis b. Himmet nâm kimse meclis-i şer‘-i şerîf ve mahfil-i dîn-i münîfe gelip işbu akdin kendilerinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, hudûdu bir tarafından Mustafa Çelebi b. Mehmed mülkü, bir tarafından Şenlik Dede vakfı, bir tarafından vadi, bir tarafından tarîk-ı âm ile mahdûd bulunan cemî‘ menzilini cümle tevâbi‘i ve levâhıkıyla râyicü’l-vakt sekiz bin akçe semen-i mu‘ayyen-i makbûzla îcâb ve kabûlü hâvî bey‘ ile bey‘ ettiğini ikrâr ve i‘tirâf eyledi. Mahalle-i mezbûrede sâkin iken bundan akdem vefât eden merhûm Hayreddin Paşa’nın vakfına mütevellî olan hâmil-i hâze’l-kitâb Mahmud Çelebi b. el-Hâc Mehmed de vakf-ı mezkûr malıyla ve istiğlâl maksadıyla menzil-i merkūmu iştirâ etti. Bâyi‘-i mezbûrun istîcârı üzere mütevellî-i mezkûr zeyl-i vesîkada muharrer târîhden bir sene tamâmına bin iki yüz akçe ücret-i kirâ ile menzil-i mezkûru ba‘de’t-tahliye ve’t-tekābüz, kendisine icâreye verdi. Vâki‘ ikrâr mütevellî-yi mezbûr tarafından vicâhen ve şifâhen tasdîk edildi. Cerâ zâlike ve hurrire fî-gurreti Ramazâni’l-mübârek li-sene isneteyn ve sittîn ve elf. Şühûdü’l-hâl: Mehmed Çelebi b. Ebûbekir, Mustafa Çelebi b. Mehmed, Abdulbâki Çelebi b. Derviş, Ali Çelebi b. Ahmed, Ahmed Çelebi b. Ali müezzin, Yusuf bey muhtesib, Mustafa b. Mehmed muhzır