Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 174 Hüküm no: 203 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zukine bt. Kostantin’in tuvaletinin komşusu Yani b. Avram’a zarar vermemesi için gerekli önlemleri alması gerektiği Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sâkinlerinden işbu râfi‘ü’s-sifr Yani v. Avram nâm zimmî meclis-i şer‘de takrîr-i kelâm edüp câr-ı mülâsıkım Zukine bt. Kostantin nâm Nasrâniyenin menzilinde vâki‘ olan kenîfi benim duvarıma muttasıl olmağla duvarıma neşf edüp küllî zarar terettüb eylediğinden mâ‘adâ râyihasından iskâna kābil olmamağla mahall-i mezbûra varılup vâki‘ hâl ba‘de’l-mu‘âyene men‘ u def‘ olunması matlûbumdur dedikde küttâb-ı mahkemeden Mevlânâ Ahmed Efendi irsâl olunup ve hâssa mi‘mârlarından Üstâd Mustafa Bey b. Abdullah ve zeyl-i kitâbda mastûru’l-esâmî olan Müslimîn ile üzerine varılup bi’l-mu‘âyene keşf ve müşâhede olunup fi’l-hakīka mezbûre Zukine’nin kenîfi müdde‘î-i mezbûrun duvarına muttasıl olup ve duvarına neşf edüp küllî zarar olduğu mu‘âyeneten müşâhede olunup ve râyihası dahi merkūm Yani’nin menziline zâhir olduğu mukarrer oldukdan sonra duvar-ı mezkûr ile kenîf beynine kadden dört zirâ‘ ve arzen iki buçuk zirâ‘ horasanlı taş duvar sed çekmek ile zararı def‘ olur deyü mi‘mâr-ı mezbûr haber verdikde mevlânâ-yı mezbûr mahallinde tahrîr ba‘dehû meclis-i şer‘de vukū‘u üzere inhâ eylemeğin mâ-vaka‘a bi’t-taleb ketb olundu. Tahrîren fi’l-yevmi’s-sânî min-Ramazâni’l-mübârek li-sene isneteyn ve sittîn ve elf. Şühûdü’l-hâl: Mustafa Beşe b. Abdullah, Derviş Beşe b. Mehmed, Oruc Beşe b. İbrahim, Mehmed Beşe b. Ramazan, Kiryako v. Nikola, Yani v. Anastaş, Yorgo v. Manol, Sava v. Yovan ve gayruhüm.