Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 175 Hüküm no: 204 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Nikola’nın birikmiş yağmur sularını Simo v. Cani’nin evinin önüne akıtmasına izin verilmemesi Husûs-ı âti’l-beyânı mahallinde keşf ve tahrîri iltimâs olunmağın küttâb-ı mahkemeden Mevlânâ Ahmed Efendi ve hâssa mi‘mârlarından Üstâd Mustafa Bey b. Abdullah ve zeyl-i kitâbda muharreru’l-esâmî Müslimîn ile mahmiye-i Galata muzâfâtından kasaba-i Beşiktaş’a tâbi‘ Arnavud nâm karyede sâkin işbu râfi‘ü’s-sifr Simo v. Cani nâm zimmînin menziline varılup akd-i meclis-i şer‘-i şerîf eylediklerinde mezbûr Simo meclis-i mezbûrda karye-i merkūme sâkinlerinden Tanaş v. Nikola nâm zimmî muvâcehesinde üzerine da‘vâ ve takrîr-i kelâm edüp mahalle-i mezbûrede kadîmü’l-eyyâmdan nüzûl-i matârda müctemi‘ olan miyâh-ı sâyilenin hîn-i vukū‘unda miyâh-ı merkūme tarîk-i âmma cârî iken mezbûr Tanaş benim sâkin olduğum menzil önüne cârî etdirdip vâki‘ hâl ba‘de’s-suâl vukūfu olan kimesnelerden istihbâr olunup men‘ u def‘ olunmak murâdımdır dedikde mahalle-i mezbûre sâkinlerinden Lenberyo Reis v. Andreya ve Yorgo v. Dimitri ve Haralampa v. Manol ve Yorgi v. Nikola ve sâirleri li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka kadîmü’l-eyyâmdan nüzûl-i emtârda müctemi‘ olan miyâh-ı sâyilenin hîn-i vukū‘unda miyâh-ı sâyile tarîk-i âmma cârî olur iken mezbûr Tanaş müdde‘î-i merkūmun menzili önüne cereyân etdirdip tarîk-i âmma cereyânına mâni‘ olur deyü herbiri alâ-tarîki’ş-şehâde haber vermeğin mevlânâ-yı mezbûr mahallinde ketb ve ba‘dehû meclis-i şer‘de alâ-vukū‘ihî inhâ eylemeğin mâ-vaka‘a bi’t-taleb ketb olundu. Tahrîren fî-evâili min-Ramazâni’l-mübârek li-sene isneteyn ve sittîn ve elf. Şühûdü’l-hâl: Derviş Beşe [b.] Abdullah, Mehmed Beşe [b.] Abdullah, Mehmed Çelebi b. Ramazan, Mustafa b. Abdullah.