Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 176 Hüküm no: 205 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköy’den Yani’nin bostan sulamak isterken kazaen kuyuya düşüp boğularak öldüğü Mahrûse-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Osman b. Abdullah nâm kimesne meclis-i şer‘de takrîr-i kelâm edüp târih-i kitâbdan bir gün mukaddem karye-i mezbûrede vâki‘ bostanımda müste’cir olan Yani nâm zimmî zikr olan bostânı suvarmak için mârrü’z-zikr bostanda vâki‘ dolab kuyusunun ipini düzer iken hatâen sâlifü’z-zikr [64a] kuyuya düşüp garîkan hâlik olmağın kıbel-i şer‘den üzerine varılup vâki‘ hâl keşf ve tahrîr olunmasın taleb ederim dedikde bu fakīr bi’l-fi‘il mahrûse-i mezbûre voyvodası olan zahrü’l-a‘yân Hüseyin Ağa’nın kethüdâları olup ve tarafından vekîl-i sâbitü’l-vekâle olan Mehmed Bey b. Ahmed ve zeyl-i kitâbda muharreru’l-esâmî olan Müslimîn ile zikr olunan kuyunun üzerine varılup hâlik-i merkūm zikri mürûr eden kuyudan ihrâc olunup yatur bulunup a‘zâsına nazar olundukda vechen mine’l-vücûh a‘zâsında eser-i cerhi ve bir kara bere dahi olmayıp ancak garîkan hâlik olduğu mu‘âyeneten müşâhede olundukdan sonra kasaba-i merkūme ahâlîsinden Mustafa Bey b. Abdullah ve Mehmed Beşe b. Abdullah nâm kimesneler meclis-i mezbûrda li-ecli’l-ihbâr hâzırân olup istihbâr olundukda fi’l-hakīka zikr olunan kuyunun ipini hâlik-i merkūm düzer iken hatâen sâlifü’z-zikr kuyuya düşdükde biz dahi mezbûr Osman’a haber verip ihrâc mahalline değin garîkan mürd olduğunu biz gördük deyü herbiri ihbâr etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Ramazâni’l-mübârek li-sene isneteyn ve sittîn ve elf. Şühûdü’l-hâl: Hüseyin Ağa b. Mustafa, Mahmud Efendi el-imâm, Mustafa Efendi el-imâm, Arslan Beşe b. Hasan, Mustafa Halîfe müezzin, İbrahim Halîfe müezzin, Mehmed Beşe b. Yahya, Mehmed Beşe b. Hasan, Receb Beşe b. Hasan, Mehmed Beşe b. Abdurrahman, Halil b. Hızır, Ali Bey subaşı, Ebûbekir Beşe b. ( ) subaşı ve gayruhüm.