Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 177 Hüküm no: 207 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaçtıktan sonra yakalanan Habeş asıllı cariye Anber’in subaşına teslim olunup kendisine nafaka tayin olunduğu Bi’l-fi‘il kasaba-i Beşiktaş subaşısı ve abd-i avâbık zâbiti olan Ali Bey b. Kemal mahfil-i kazâda işbu açık kaşlı uzun boylu Habeşiyy[et]ü’l-asl Anber bt. Abdullah nâm câriyeyi ihzâr ve muvâcehesinde takrîr-i kelâm edüp câriye-i mezbûreyi kasaba-i mezbûre mahallâtından Sinanpaşa mahallesi sâkinlerinden Maden nâm kimesne ve zevcesi Pederhay nâm hatun mezbûre Anber’i idlâl ve menzillerinde ihfâ eyleyüp ben dahi hâlâ yedlerinden ahz eyledim suâl olunup rıkkına ve ibâkına i‘tirâfından sonra mevlâsı zâhir veya müddet-i örfiyyesi tamâm olunca bana teslîm olunup nafaka takrîr olunmasını taleb ederim dedikde câriye-i mezbûre istintâk olundukda cevâbında İstanbul’da Şehzâde kurbünde Kemal Çelebi nâm kimesnenin câriye-i memlûkesi olup mezbûrân Maden ve Pederhay beni idlâl edüp dört aydır menzillerinde iskân etdirirler deyü rık ve ibâkına mu‘terife olmağın câriye-i mezbûrenin mevlâsı zuhûr edince[ye kadar] merkūm Ali Bey’e teslîm ve nafakası’çün yevmî altışar akçe farz ve takdîr olunup mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Ramazâni’l-mübârek li-sene isneteyn ve sittîn ve elf. Şühûdü’l-hâl: Huddâm-ı mahkeme ve gayruhüm.