|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 182 Hüküm no: 135 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hafize Hatun’a olan borcundan dolayı hapsedilen Mehmed Salih Ağa’nın borcunu tecil ve taksitlendirmesi
Ma‘rûz-ı dâ‘î-i Devlet-i aliyyeleridir ki
Sâdır olan fermân-ı âlîlerine imtisâlen hâmiş-i arzuhâlde mastûr derkenâr nâtık olduğu üzere derûn-ı arzuhâlde mezkûretü’l-ism Hafize Hatun bt. İsmail’e bâ-i‘lâm-ı şer‘î mahkûmün-bih altı bin yüz yetmiş beş guruş deyni için bir müddetden beri mahbûs olan kezâlik derûn-ı arzuhâlde ismi mezkûr Destgâhcı Mehmed Salih Ağa b. Mehmed nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de merkūme Hafize Hatun’un li-ebeveyn er karındaşı ve tarafından husûs-ı âti’l-beyânda vekîl-i müsbet-i şer‘îsi Musa Ağa muvâcehesinde benim müvekkile-i merkūme Hafize Hatuna ber-vech-i muharrer zimmetimde cihet-i karzdan bâ-i‘lâm-ı şer‘î mahkûmün-bih altı bin yüz yetmiş beş guruş deynim olup lâkin deynim olan meblağ-ı mezkûru müvekkile-i merkūme Hafize Hatun’a hâlâ def‘aten bir vechile edâya iktidârım olmamağla ber-vech-i âtî istimhâl eylediğimde vekîl-i mezbûr Musa Ağa dahi kız karındaşı ve müvekkilesi dâyinem mezbûreye izâfetle meblağ-ı mezkûrun yüz yetmiş beş guruşu mutâlebesine müte‘allika da‘vâdan benim zimmetimi bi’l-vekâle kabûlü hâvî ibrâ ve iskāt edip bâkīsi olan altı bin guruşun bin guruşunu işbu târîh-i i‘lâmdan on gün mürûrunda ve mâ‘adâsı olan beş bin guruşu dahi sene-i âtiye Muharremi’l-harâmı gurresinden i‘tibâren beher şehr ikişer yüz guruş verip mecmû‘u târîh-i mezkûrdan yirmi beş ay tamâmına değin tamâmen müvekkile-i mezbûre Hafize Hatun’a edâ ve îfâ etmek üzere rızâsıyla bi’l-vekâle beni imhâl ve te’hîr eylediğinden sonra medîne-i mezbûrede Ahmediye mahallesinde sâkine işbu hâzıra bi’l-meclis mu‘arrefetü’z-zât Şerife Âişe Sıdıka bt. el-Hâc Hasan nâm hatun dahi deynim olan meblağ-ı bâkī-i mezkûr altı bin guruşa emrimle kefâlet-i mutlaka-i sahîha-i şer‘iyye ile kabûle mukārin kefîl ve zâmin oldu deyü mukırr-ı merkūm Mehmed Salih Ağa’nın bi’l-cümle takrîr-i meşrûhunu vekîl-i merkūm Musa Ağa ile hâzıra-i merkūme Şerife Âişe Hatun’dan her biri tasdîk ve tahkīk eyledikleri tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 19 Z sene [12]56.
|