Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 178 Hüküm no: 210 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Bey b. Mustafa’nın istiğlâl yoluyla evini Ayşe Hatun’a sattığı Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden Derviş Bey b. Mustafa nâm kimesne mahfil-i kazâda işbu râfi‘atü’l-kitâb Aîşe bt. Abdullah nâm hatun mahzarında ikrâr ve takrîr-i kelâm edüp mahalle-i mezbûrede vâki‘ bir tarafı yine kendi mülküm ve bir tarafı Osman Efendi mülkü ve bir tarafı Deli Mehmed mülkü ve bir tarafı tarîk-i âm ile mahdûd mülk menzilimi cemî‘-i tevâbi‘ ve levâhıkı ile mezbûre Âişe Hatun’a kendi mâlı ile yedi bin fıddî râyic fi’l-vakt akçeye alâ-tarîki’l-istiğlâl bey‘ ve teslîm edüp ol dahi ber-vech-i muharrer iştirâ ve tesellüm edüp ve semen-i mezkûr yedi bin akçeyi mezbûre Âişe Hatun yedinden tamâmen alıp kabz eyledikden sonra yine menzil-i mezkûru gıbbe’t-tahliyeti’ş-şer‘iyye târih-i kitâbdan bir sene tamâmına değin bin akçeye bana îcâr ve teslîm edüp ben dahi vech-i meşrûh üzere istîcâr ve kabûl eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sânî aşer min-şehri Ramazâni’l-mübârek li-sene isneteyn ve sittîn ve elf. Şühûdü’l-hâl: Mustafa Çelebi b. Ahmed, Ali Bey b. Kemal, Ahmed Çelebi b. Receb, Mustafa Beşe b. Mehmed, Mehmed b. Ramazan.