Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 179 Hüküm no: 211 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako v. Heyder’in Ortaköy’deki iki bağdaki hissesini Semha bt. Şemoyil’e sattığı Mahrûse-i Galata muzâfâtından Ortaköy demekle ma‘rûfe karyede sâkin iken bundan akdem hâlik olan Heyder nâm Yahudinin verâseti sulbî kebîr oğulları Kemal ve Yako’ya ve sulbiye kebîre kızları Rika ve Hanola’ya münhasıra olup kable’s-kısme mezbûr Kemal dahi hâlik olup verâseti sulbî oğlu diğer Heyder ile sulbiye kızları İlya ve Esterola’ya münhasıra olmağla muhallefâtından olup karye-i mezbûrede Ayazma nâm mevzi‘de vâki‘ bir tarafı Mosi v. Anna nâm Yahudi bağı ve bir tarafı Yanaki v. Nikite bağı ve bir tarafı Angeli v. Mavridi bağı ve bir tarafı bazen Çalık v. Avraham bağı ve bazen tarîk-i âm ile mahdûd tahmînen altı dönüm mikdârı bir kıt‘a ve yine mevzi‘-i merkūmda vâki‘ bir tarafı Ekmekçi Mestor Yani bağı ve bir tarafı Menahim v. Avraham bağı ve bir tarafı vâdi ve bir tarafı tarîk-i âm ile mahdûd tahmînen dört dönüm mikdârı bir kıt‘a ki cem‘an iki kıt‘a bağdan bi-hükmi’l-münâsahati’ş-şer‘iyye on iki sehimden dört sehmi mezbûr Yako’ya ve ikişer sehmi mezbûretân Rika ve Hanola’ya ve dört sehmi merkūmun diğer Heyder ve İlya ve Esterola’ya isâbet eylediği şer‘an zâhir ve mütehakkık oldukdan sonra mezbûr Yako meclis-i şer‘-i hatîr-i lâzımü’t-tevkīrde mezbûr diğer Heyder ve İlya ve Esterola vâlideleri Semha bt. Şemoyil nâm Yahudiyenin zevci ve husûs-ı câ’i’z-zikri tasdîka vekîli olup nehc-i mu‘teber-i mer‘î ile üzerine şer‘an vekâleti sâbite olan işbu bâ‘isü’s-sifr [66b] Arslan v. Yasef nâm Yahudi muvâcehesinde ikrâr ve takrîr-i kelâm edüp zikr olunan iki kıt‘a bağdan sâlifü’z-zikr dört sehm hisse-i şâyi‘a-i şer‘iyyemi kırk beş kıt‘a riyâlî kebîr guruşa müvekkile-i mezbûre Semha’ya bey‘-i bâtt-ı sahîh-i şer‘î ile bey‘ ve teslîm edüp ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûru yedinden tamâmen alıp kabz eyledim dedikde gıbbe’t-tasdîki’ş-şer‘î merkūmîn diğer Heyder ve İlya ve Esterola taraflarından husûs-ı âti’l-beyânı ikrâra vekîl olup Arslan v. Mosi ve Simo v. Simo nâm Yahudiler şehâdetleri ile şer‘an vekâleti sâbite olan Küçük Sisilye cemâ‘atinden Baroh v. Danyel dahi meclis-i mezbûrda merkūm Arslan muvâcehesinde bi’l-vekâle ikrâr ve takrîr-i kelâm edüp müvekkilûn-ı merkūmûn mârrü’z-zikr iki kıt‘a bağdan cem‘an dört sehm hisse-i şâyi‘a-i şer‘iyyelerini kırk beş kıt‘a mezbûrü’n-na‘t riyâlî guruşa yine vâlideleri müvekkile-i mezbûre Semha’ya bey‘-i bâtt-ı sahîh-i şer‘î ile bey‘ ve teslîm edüp ol dahi ber-vech-i mübeyyen iştirâ ve tesellüm eyledikden sonra semeni olan meblağ-ı mezbûr kırk beş kıt‘a riyâlî guruşu yedinden tamâmen alıp kabz eyledik dediler dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-âşir min-Ramazâni’l-mübârek li-sene isneteyn ve sittîn ve elf. Şühûdü’l-hâl: Mehmed Çelebi b. Mehmed, Mustafa b. Mehmed, Cafer b. Mehmed, Mehmed b. Ramazan, Ahmed b. Receb, Avraham v. Hayim, Nasih v. Mosim, Beram v. David ve gayruhüm.