Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 180 Hüküm no: 212 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Heyder, İlya ve Esterola’nın Ortaköy’deki menzil hisselerini Semha bt. Semoyil’e sattıkları Mahmiye-i Galata muzâfâtından kasaba-i Beşiktaş’a tâbi‘ Ortaköy demekle ma‘rûfe karye sâkinlerinden iken bundan akdem hâlik olan Heyder v. Yako nâm Yahudinin verâseti sulbî kebîr oğulları Kemal ve Yako’ya ve sulbiye kebîre kızları Rika ve Hanola’ya münhasıra olup kable’l-kısme mezbûr Kemal dahi hâlik olup verâseti sulbî oğlu diğer Heider’e ve sulbiye kızları İlya ve Esterola’ya münhasıra olmağla muhallefâtından olup karye-i merkūmede bir tarafı Mordehay nâm Yahudi mülkü ve iki tarafı tarîk-i âm ve bir tarafı Yahya nâm Yahudi mülkü ile mahdûd fevkānî iki bâb beyti ve sofayı ve gurfeyi ve tahtânî iki bâb beyti ve bi’r-i mâ’î ve fırını ve kenîfi ve muhavvata-i zât-ı eşcâr-ı müsmire ve gayr-ı müsmire hadîkayı müştemil menzilden bi-hükmi’l-münâsahati’ş-şer‘iyye on iki sehimden dört sehmi mezbûr Yako’ya ve ikişer sehmi mezbûretân Rika ve Hanola’ya ve dört sehmi mezbûrûn diğer Heyder ve İlya ve Esterola’ya isâbet eylediği şer‘an zâhir ve mütehakkık, mezbûrûn diğer Heyder ve İlya ve Esterola taraflarından husûs-ı âti’l-beyânı ikrâra vekîl olup hasm-ı şer‘î-i câhid mahzarında Arslan v. Mosi ve Simo v. Simo nâm Yahudiler şehâdetleri ile şer‘an vekâleti sâbite olan Küçük Sisilye cemâ‘atinden Baroh v. Danyel mahfil-i şer‘-i kavîm-i vâcibü’t-tekrîmde müvekkilûn-ı mezbûrûnun vâlideleri Semha bt. Şemayil nâm Yahudiyenin zevci ve husûs-ı câ’i’z-zikri tasdîka vekîli olup nehc-i mu‘teber-i mer‘î üzere şer‘an vekâleti sâbite olan bâ‘isü’s-sifr Arslan v. Yasef nâm Yahudi muvâcehesinde bi’l-vekâle ikrâr ve takrîr-i kelâm edüp müvekkilûn-ı mezbûrûn mârrü’z-zikr menzilden sâlifü’z-zikr dört sehm hisse-i şâyi‘a-i şer‘iyyelerini yüz elli kıt‘a riyâlî kebîr guruşa vâlideleri müvekkile-i mezbûre Semha’ya bey‘-i bâtt-ı sahîh-i şer‘î ile bey‘ ve teslîm ol dahi ber-vech-i mübeyyen iştirâ ve tesellüm eyledikden sonra semeni olan meblağ-ı mezbûr yüz elli kıt‘a guruşu yedinden tamâmen alıp kabz eyledik dediler dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Şühûdü’l-hâl: es-Sâbikūn.