Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 181 Hüküm no: 213 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Vasil’in Ortaköy’deki bağını Yahudi İlya v. Mosi’ye sattığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Dimitri v. Vasil nâm zimmî meclis-i şer‘-i şerîf-i lâzımü’t-teşrîfde Kiroz cemâ‘atinden işbu râfi‘ü’s-sifr İlya v. Mosi nâm Yahudi muvâcehesinde bi-tav‘ihî ikrâr ve takrîr-i kelâm edüp karye-i mezbûrede Kasımtolu demekle ma‘rûf mevzi‘de vâki‘ iki tarafı kendi tarlam ve bir tarafı Kiryakoz nâm zimmî bağı ve bir tarafı bazen vâdi ve bazen tarîk-i âm ile mahdûd tahmînen yetmiş üç çubuk isti‘âb eder beş dönüm mikdârı bir kıt‘a mülk bağımı mezbûr İlya’ya iki yüz kırk kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm ve kabz eyledikden sonra semeni olan meblağ-ı mârrü’z-zikr iki yüz kırk kıt‘a riyâlî guruşu merkūm İlya yedinden tamâmen alıp kabz eyledim ba‘de’l-yevm sâlifü’z-zikr bağ mersûm İlya’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î karye-i mezbûre sâkinlerinden Panayot v. Yani ve Nikola v. Velisaz ve Manol v. Arslan ve Yanaki v. Kiryako nâm zimmîler zikri mürûr eden bağın derkine her biri tarafeynden emr ve kabûlü hâvî kefâlet-i sahîha-i şer‘iyye ile kefîl olmağın mâ-vaka‘a bi’t-taleb ketb olundu. Tahrîren fi’l-yevmi’s-sâdis min-şehri Ramazâni’l-mübârek li-sene isneteyn ve sittîn ve elf. Şühûdü’l-hâl: Mahmud Efendi el-imâm, Mehmed Çelebi b. Mehmed, Mustafa Çelebi b. Abdi, Arslan Beşe b. Hasan, Mehmed Beşe b. Hasan, Ahmed Beşe b. Hasan, Muslı Beşe b. Receb, Ali Çelebi b. Musa, Receb Beşe [b.] Hasan, Mustafa muhzır, İsrail v. Yakob, İsak v. David, Yasef v. Yako ve gayruhüm.