Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 181 Hüküm no: 214 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yani v. Barana’nın Osman b. Abdullah zimmetinde kalan alacağının varisleri tarafından tahsil edildiği Vilâyet-i Rumeli’nde Ohri kazâsı tevâbi‘inden Volime [Voline] nâm karye sâkinlerinden olup mukaddemâ mahrûse-i Galata muzâfâtından kasaba-i Beşiktaş’a tâbi‘ Ortaköy demekle ma‘rûf karyede bostancı tâifesinden Osman b. Abdullah nâm kimesnenin müste’ciri iken hâlik olan Yani v. Barana nâm zimmînin verâseti vâlidesi Maroye nâm Nasrâniye ile li-ebeveyn er karındaşı Nakale nâm zimmîye münhasıra olduğu mahzar-ı hasm-ı câhidde zikr olunan Volime karyesi sükkânından Nifce v. Nedelko ve İstoyani v. Nikola ve Marko v. İstoyani nâm zimmîler şehâdetleri ile şer‘an sâbit ve mütehakkık [67a] oldukdan sonra mezbûr Nakale kendi tarafından asâleten ve vâlidesi merkūme Maroye tarafından meblağ-ı câ’i’z-zikrden hisse-i şer‘iyyesini ahz u kabza ve kendüye îsâle vekîl olduğu hâkim-i muvakkı‘-ı sadr-ı kitâb huzûrunda nehc-i mu‘teber-i şer‘î üzere sâbite oldukdan sonra vekâleten meclis-i şer‘-i şerîfde işbu sâhibü’l-kitâb mezbûr Osman mahzarında ikrâr ve takrîr-i kelâm edüp karındaşım hâlik-i merkūm hâl-i sıhhatinde mersûm Osman ile bostanında bir sene hizmet etmek üzere bin altı yüz akçe ücret kavl edüp dokuz ay tamâmında hâlik olmağın zikr olunan dokuz aylıkda müstahık olduğu cem‘an bin iki yüz akçe ücretinin iki yüz akçesini sıhhati hâlinde yedinden alıp bâkī bin akçe ücreti ba‘de helâkihî bana ve vâlidem müvekkile-i mezbûreye intikāl etmeğin hâlâ meblağ-ı bâkī bin akçe ücreti asâleten ve vekâleten mezbûr Osman yedinden alıp karındaşım hâlik-i merkūmun sâir muhallefâtından mezbûr Osman yedinden alıp kabz eyledim meblağ-ı bâkī bin akçe ücretden ve karındaşım hâlik-i mezbûrun sâir muhallefâtından merkūm Osman yedinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ-vaka‘a bi’t-taleb [ketb olundu.] Tahrîren fî-evâsıtı min-şehri Ramazâni’l-mübârek li-sene isneteyn ve sittîn ve elf. Şühûdü’l-hâl: Şuhûdü’s-sâbikūn.