Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 185 Hüküm no: 220 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Londi ve Yani v. İstati’nin Saime bt. Veli ve Fatma bt. Abdullah ile fuhuş yaptıkları Mahmiye-i Galata’ya tâbi‘ kasaba-i Beşiktaş’da bi’l-fi‘il subaşı olan Ali Bey b. Mustafa tarafından vekîl-i sâbitü’l-vekâle olan Veli Beşe b. İbrahim meclis-i şer‘a gelip takrîr-i kelâm edüp uncu tâifesinden Dimitri v. Londi ve Yani v. İstati nâm zimmîler kasaba-i merkūme mahallâtından Sinan Paşa-yı Cedîd mahallesinde sâkine Sâime bt. Veli nâm hatunun menzilinde mezbûre Sâime ve ecnebiyyeden Fâtıma b. Abdullah nâm hatunun hâlâ fısk ve fahş üzere oldukları mesmû‘um olmuşdur cânib-i şer‘den üzerine varılup vâki‘ hâl keşf ve tahrîr olunmak matlûbumdur dedikde savb-ı şer‘den Mevlânâ Ahmed Efendi irsâl olunup ol dahi zeyl-i kitâbda mastûru’l-esâmî olan Müslimîn ile sâlifü’z-zikr menzile vardıklarında merkūmetân Fâtıma ve Sâime mezbûrân Dimitri ve Yani ile bir hâlî menzil içinde üryânen ahz olunup evvelâ merkūmân Dimitri ve Yani istintâk olundukda merkūme Sâime’nin zevci Mustafa[‘da] bir mikdâr akçe hakkımız olmağla dâimâ bizler gelir gideriz deyü cevâb verdiklerinden sonra merkūmetân Sâime ve Fâtıma dahi istintâk olunduklarında istimâ‘ ve kabûle kābil cevâbları olmayıp mezbûrân Dimitri ve Yani kendilere nâ-mahrem olup dâimâ menzillerine gelip gider deyü her biri fesâdları ikrâr ve i‘tirâf etmeğin vâki‘ hâli mevlânâ-yı mezbûr mahallinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâdî aşer min-Şa‘bân li-sene isneteyn ve sittîn ve elf. Şühûdü’l-hâl: İbrahim Çelebi b. Abdullah, Hasan b. Mehmed er-râcil, Mehmed Çelebi b. Hanifi, Ali Beşe b. Mahmud, İbrahim b. ( ), Mehmed Çelebi b. Ramazan, Mustafa b. Mehmed, Safer b. Mehmed ve gayruhüm.