Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 186 Hüküm no: 221 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap olan Ahmed Beşe ile Yani v. Yorgi’nin kestikleri hayvanların baş ve ayaklarını Hasan Beşe b. Kasım’a vermeleri gerektiği Mahrûse-i Galata hârici kasaba-i Fındıklı’da paçacı olan râfi‘ü hâze’l-kitâb Hasan Beşe b. Kasım mahfil-i kazâda kasab tâifesinden Ahmed b. ( ) er-râcil ve Yani v. Yorgi mahzarlarında takrîr-i da‘vâ ve bast-ı merâm edüp mezbûrân Ahmed ve Yani kadîmden salhânelerinde zebh eyledikleri koyun ve keçi ve sığır başların ve ayakların dört hisse olmak üzere bize veregelmişler iken hâlâ hilâf-ı mu‘tâd âhara verip bize vermekde ta‘annüd etmeleri ile ahvâlimizi der-i devlete i‘lâm eylediğimizde vaz‘-ı kadîm üzere dört hisse mezbûrâna verilip âhara verilmeye deyü yedimizde emr-i şerîf-i cihân-mutâ‘ verilmişdir mezbûrânın muvâcehelerinde feth u kırâ’et olunup ve vâki‘ hâl kendilerden suâl olundukdan sonra vech-i muharrer üzere cânib-i şer‘den dahi tenbîh olunması matlûbumdur deyü ibrâz eylediği emr-i vâcibü’l-imtisâl merkūmânın muvâcehelerinde feth u kırâ’et olundukdan sonra vâki‘ hâl kendilerden suâl olundukda mezbûr Ahmed Beşe ve Yani kadîmden zebh eyledikleri koyun ve keçi ve sığır başların ve ayakların mezbûra verip âhara veregelmediklerin ikrâr ve i‘tirâf etdiklerinde ber-mûceb-i emr-i âlî ve vech-i mübeyyen üzere merkūmâna tenbîh olundu mâ-vaka‘a kayd şüd. Hurrire fî şehri Ramazân li-sene isneteyn ve sittîn ve elf. Şühûdü’l-hâl: Mehmed Çelebi b. Ramazan, Mustafa b. Mehmed, Cafer b. Mehmed ve gayruhüm.