Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 186 Hüküm no: 222 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Onakdor v. Nikişe’nin menzilini Rüstem Bey b. Abdullah’a satıp bedelinin bir kısmını borcuna takas ettiği Vilâyet-i Rumeli’nde Ahyolu kazâsına tâbi‘ Ahtabolu nâm karyeden Onakdor? v. Nikişe nâm zimmî mahfil-i kazâda hadîka-i hâssa bostâncılarından Rüstem Bey b. Abdullah mahzarında ikrâr ve takrîr-i kelâm edüp karye-i mezbûrede vâki‘ etrâf-ı erba‘ada Tanaş ve Todori ve Yorgi ve tarîk-i âm ile mahdûdd bir bâb fevkānî oda ve tahtında bir bâb mahzen ve havluyu müştemil mülk menzilimi mezbûr Rüstem Bey’e fıddî râyic [fi’l]-vakt dokuz bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i muharrer üzere iştirâ eyledikden sonra semeni olan meblağ-ı mezbûru merkūm Rüstem Bey’e deynim olan on altı bin akçenin dokuz bin akçesi ile takās eyleyüp menzil-i mezbûru mahallinde zabt ve tasarrufa merkūm Rüstem Bey’i taslît eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fi evâili Şevvâl li-sene isneteyn ve sittîn ve elf. Şühûdü’l-hâl: Musa Beşe b. Derviş, Cafer b. Mehmed, Mehmed b. Ramazan, Ahmed b. Abdullah ve gayruhüm.