Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 187 Hüküm no: 223 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harap vakıf menzilin Ramazan Bey b. Abdülmennan’a kiraya verilip kira gelirine Mahmud Ağa b. Ömer Ağa’nın mütevelli tayin olunduğu Ashâb-ı hayrâtdan merhûm Nasûh Bey b. Abdülmu‘în nâm kimesnenin vakıf ve gallesini ale’l-iştirâki’s-seviy mahmiye-i Galata’ya tâbi‘ kasaba-i Beşiktaş’da Sinan Paşa-yı Cedîd mahallesinde vâki‘ mescid-i şerîfinin imâm ve müezzinine şart ve ta‘yîn eylediği yine mahalle-i merkūmede vâki‘ bir tarafı Ahmed Çelebi b. Abdullah mülkü ve bir tarafı bazen Râziye bt. Memi ve bazen Mustafa Kapudan b. Ali mülkleri ve bir tarafı bazen Ahmed Reis mülkü ve bazen tarîk-i hâs ve bir tarafı tarîk-i âm ile mahdûd üç bâb tahtânî odayı ve bir gasilhâneyi ve bi’r-i mâ’î ve kenîfi ve zât-ı eşcâr-ı müsmire ve gayr-ı müsmireyi muhtevî hadîkayı müştemil menzil mürûr-ı eyyâm ve kürûr-ı a‘vâm ile harâba müşrif olup kābil-i süknâ olmayıp ve ta‘mîr ve meremmetine dahi cânib-i vakıfdan müsâ‘ade olmadığı hâkim-i muvakkı‘-ı sadr-ı kitâb huzûrunda şer‘an sâbit ve mütehakkık oldukdan sonra mescid-i mezbûr imâmı olan Abdülkerîm Çelebi Efendi b. Yahya nâm kimesne mukaddemâ menzil-i mezbûra mütevellî nasb ve ta‘yîn olunup ol dahi ba‘de’l-kabûl menzil-i merkūmu hâkim-i mûmâ-ileyhden me’zûnen isre’l-müzâyede vakfa enfa‘ olduğu ecilden yüz yirmi beş kıt‘a riyâlî kebîr guruş icâre-i mu‘accele ve senede [69b] yüz yirmi akçe ücret-i mü’eccele ile Ramazan Bey b. Abdülmennan nâm kimesneye îcâr ve teslîm ol dahi ber-vech-i mübeyyen istîcâr ve tesellüm edüp icâre-i mu‘accelesi olan yüz yirmi beş kıt‘a mezbûrü’n-na‘t guruşu mezbûr Ramazan Bey yedinden ahz u kabz eyledikde meblağ-ı mezbûru istirbâh ve beher sene hâsıl olan ribhini mezbûr Abdülkerîm Efendi ile mescid-i mezbûrda müezzin olup vakf-ı merkūma cânib-i şer‘den nâzır nasb olan Mehmed Çelebi b. Hanifi ahz u kabz ve mukābelesinde küllü yevm birer sûre-i Mülk-i şerîf kırâ’et edüp sevâbını rûh-ı vâkıf-ı mezbûra ihdâ etmek üzere mezbûr Abdülkerîm Efendi’ye taraf-ı şer‘den izin verilmişidi el-hâletü hâzihî mezbûr Abdülkerîm Efendi meclis-i şer‘a hâzır ve tevliyet-i mezbûre uhdesinden gelmeğe adem-i iktidârı olmağla fâriğ olmağın mahalle-i mezbûre ahâlîsinden cemm-i gafîr ve cem‘-i kesîr ihbârları ile her vechile mahall ü müstahık olan râfi‘ü hâze’l-kitâb Mahmud Ağa b. Ömer Ağa yine beher sene galle-i mezbûru mütevellî-i sâbık-ı mezbûr Abdülkerîm Efendi ile merkūm Mehmed Çelebi’ye vermek üzere vakf-ı mezbûra ber-vech-i hasbî mütevellî nasb ü ta‘yîn olunup ol dahi tevliyet-i mezbûreyi kabûl ve hizmet-i lâzımesini edâya ta‘ahhüd ve meblağ-ı mezbûr yüz yirmi beş kıt‘a riyâlî guruşu mütevellî-i sâbık mersûm Abdülkerîm Efendi yedinden meclis-i şer‘de tamâmen alıp kabz ve tesellüm etmeğin işbu vesîka-i enîka alâ-mâ-hüve’l-hakīka bi’t-taleb ketb ve terkīm olundu. Tahrîren fi’l-yevmi’s-sâdis min-şehri Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mefharü’l-akrân Mehmed Ağa b. Ömer Bey, Fahrü’l-emsâl Abdüsselâm Kapudan b. Receb kethüdâ, Ali Bey b. Abdülmennan, Mehmed Çelebi b. el-Hâc Mustafa, Mehmed Çelebi b. Mahmud, Hayrullah Çelebi b. Mustafa, Mehmed Bey b. Ali, Osman Çelebi b. Ahmed, Lütfi Çelebi b. Mustafa, İsmail Çelebi b. Mehmed, Ömer Çelebi b. Ali, Ali Beşe b. Abdullah, İbrahim Beşe b. Veli, Ahmed Reis b. Abdullah, Hasan Beşe b. Ali, Mehmed Beşe b. Nasûh, Ali Çelebi b. Cafer, Mehmed Çelebi b. Veli, Cafer b. Mehmed ve gayruhüm.