Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 188 Hüküm no: 224 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kılıç Ali Paşa Vakfı’na ait harap menzilin tamir edilmek şartıyla Mehmed Ağa b. Abdullah’a kiralandığı Mahmiye-i Galata’ya tâbi‘ kasaba-i Beşiktaş’da vâki‘ merhûm Kılıç Ali Paşa’nın süknâ ve gallesi utekā ve evlâd-ı utekāsına şart ve ta‘yîn eylediği ma‘lûmü’l-hudûd sarayın hücerâtından bir tarafı umdetü’l-müderrisîni’l-kirâm Bakizâde Efendi mülkü ve bir tarafı sâhil-i bahr ve bir tarafı mevlevîhâne ve bir tarafı tarîk-i hâs ile mahdûd üç bâb fevkānî odayı ve tahtında mahzeni ve muhavvatayı müştemil menzile meşrûtiyyet üzere mutasarrıf olan Aynî Hatun bt. Abdullah meclis-i şer‘de Mehmed Ağa b. Abdullah mahzarında takrîr-i kelâm edüp menzil-i mahdûd-ı mezkûr mürûr-ı eyyâm ve kürûr-ı şühûr [ve] a‘vâm ile harâba müşrif olup ta‘mîr [ve] meremmetine kendisin dahi vakf-ı mezbûrda (…) kudreti olmadığından mâ‘adâ min-ba‘d menzil-i mezbûr kābil-i süknâ olmamağın müşârun ileyh Mehmed Ağa menzil-i merkūmu kendi malından ta‘mîr ve meremmet eyleyüp beher senede taraf-ı vakfa üç yüz akçe ücret-i mü’eccele vermeğe ta‘ahhüd etmeğin ber-vech-i muharrer müşârun ileyhin ta‘ahhüdü taraf-ı vakfa her vechile enfa‘ ve evlâ ve ahrâ olmağın [70a] vakf-ı mezbûr vech-i mübeyyen üzere müşârun ileyh Mehmed Ağa’ya izin verdikden sonra ben dahi hakk-ı süknâmı ve nevbet-i tasarrufumu müşârun ileyhe fâriğ olup mukābele-i ferâgat yedinden yirmi bin akçe alıp kabz eyledim ba‘de’l-yevm menzil-i mezkûra merkūm Mehmed Ağa sâirler gibi mutasarrıf olsun dedikde gıbbe’t-tasdîki’ş-şer‘î mâ-vaka‘a kayd şüd. Tahrîren fî-gurreti Şevvâl li-sene isneteyn ve sittîn ve elf. Şühûdü’l-hâl: Ahmed Çelebi b. Cafer, Hüseyin Çelebi b. Yusuf, Mehmed Efendi el-kâtib, Yusuf Bey b. Mehmed, Hasan Bey b. ( ), Mustafa b. Abdullah, Mustafa b. Mehmed ve gayruhüm.