Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 189 Hüküm no: 225 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Mehmed’in talebi üzerine beş kişi tarafından yaralandığının mahallinde tespit olunduğu Husûs-ı âti’l-beyânın mahallinde tahrîri iltimâs olunmağın bu fakīr zeyl-i sahifede mastûru’l-esâmî olan Müslimîn ile mahmiye-i Galata’ya tâbi‘ kasaba-i Beşiktaş’da Sinanpaşa mahallesinden Salih b. Mehmed nâm mecrûhun menziline varup akd-i meclis-i şer‘-i şerîf olundukda mezbûr Salih meclis-i merkūmda takrîr-i kelâm edüp târih-i kitâb gecesi kable’l-fecr Sultânlimanı demekle ma‘rûf nâm mahalde yine mahalle-i mezbûrede sâkine Kaya bt. Hüseyin nâm hatunun menzilinden Hasan nâm bostanî ve es-Seyyid Süleyman nâm kimesneler ve isimleri ma‘lûmum değil beş nefer âdem çıkıp bi-gayrı vech-i şer‘î balta ile sol dirseğimi başımın sol tarafını ve burnumun üstünü urup mecrûh etmişlerdir cerhim ba‘de’l-müşâhede keşf ve tahrîr olunmasın taleb ederim dedikde ba‘de’l-keşf mezbûrun sol dirseğinde ve başının sol tarafında ve yüzünde eser-i cerhi olduğu müşâhede ve mu‘âyene olunmağın vâki‘ hâl bi’t-taleb ketb ve tahrîr olundu. Tahrîren fi’l-yevmi’l-hâdî aşer min-Şevvâli’l-mükerrem sene isneteyn ve sittîn ve elf mine’l-hicreti’n-nebeviyye. Şühûdü’l-hâl: Ramazan Çavuş el-mübâşir, Mehmed Çelebi, Mehmed Çelebi b. Mehmed, Mehmed b. Şaban, Mahmud Çelebi ve gayruhüm.