Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 189 Hüküm no: 226 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad’ın arkadaşlarıyla birlikte kaçırdığı Ümmühani bt. Ramazan’a tecavüz ettiği Mahmiye-i Galata’ya tâbi‘ kasaba-i Beşiktaş’da bi’l-fi‘il subaşı olan Ali Bey [b.] Kemal nâm kimesne meclis-i şer‘-i hatîr-i lâzımü’t-tevkīrde mahrûse-i Kostantıniyye’de Avratpazarı sâkinelerinden Ümmühânî bt. Ramazan nâm hatunu ihzâr ve mahzarında takrîr-i kelâm edüp mezbûre Ümmühânî’yi târih-i kitâbdan üç gün mukaddem nâ-mahremden gāibûn ani’l-meclis Murad ve Ali ve Halil nâm kimesneler ile kasaba-i merkūme hâricinde Hasan Paşa bahçe ardında bir hâlî mevzi‘de ahz eyledikde mezbûrûn gaybet eylemişdir vâki‘ hâl merkūmeden suâl olunup takrîri tahrîr olunması matlûbumdur dedikde mezbûre Ümmühânî istintâk olundukda cevâbında târih-i merkūmda kendi ihtiyârım ile bir mesâlih için Üsküdar’a gitmek murâd eylediğimde kasaba-i merkūmede Arab İskelesi kurbünde merkūmûn Murad ve Ali ve Halil bıçak ile üzerime hücûm edüp cebren beni mevzi‘-i merkūma iletip mersûm Murad bana fi‘il-i şenî‘ etmeğin mezkûr subaşı ahz eyledi dedikde vâki‘ hâl hıfzan li’l-mekāl bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene isneteyn ve sittîn ve elf. Şühûdü’l-hâl: el-Hâc Ali b. ( ), el-Hâc Osman b. Mehmed, Ömer b. Abdullah, Mehmed b. Ahmed, Mustafa b. Mehmed.