Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 190 Hüküm no: 228 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Çelebi b. Sadık’ın Arap İskelesi mahallesindeki menzilinin varisleri arasında paylaştırıldığı Husûs-ı âti’l-beyânın mahallinde tahrîri iltimâs olunmağın bu fakīr hâssa mi‘mârlarından Üstâd Ahmed b. Abdullah ve Üstâd Mustafa b. Abdullah ve zeyl-i kitâbda mastûru’l-esâmî olan Müslimîn ile mahmiye-i Galata’ya tâbi‘ kasaba-i Beşiktaş’da Arab İskelesi mahallesi sükkânından iken bundan akdem müteveffâ olan Ali Çelebi b. Sâdık nâm kimesnenin mahalle-i mezbûrede vâki‘ bir tarafı hadîka-i sultâniye ve bir tarafı bazen Bayram Beşe ve bazen Gülâbî Mehmed Çelebi mülkleri ve bir tarafı bazen Gonca Mehmed Çelebi ve bazen Zâhide Hatun mülkleri ve bir tarafı tarîk-i âm ile mahdûd iki bâb fevkānî odayı ve iki yan sofayı ve bir orta sofayı ve iki bâb tahtânî odayı ve zât-ı eşcâr-ı müsmire ve gayr-ı müsmire hadîkayı ve hadîka-i mersûme kurbünde vâki‘ bir bâb tahtânî odayı ve bir yan sofayı ve bi’r-i mâyi ve fırını müştemil menzile varup akd-i meclis-i şer‘-i şerîf olundukda müteveffâ-yı mezbûrun verâseti zevce-i metrûkesi Ümmühânî bt. Abdullah nâm hatuna ve sulbî kebîr oğulları Cafer Bey ve Fazlı Bey nâm kimesnelere ve sulbiye kebîre kızları Havvâ ve Neslihân’a münhasıra olduğu şer‘an zâhir ve müte‘ayyin oldukdan sonra mezbûr Cafer Bey kendi tarafından asâleten ve kız karındaşı merkūme Havvâ ile vâlidesi mezbûre Ümmühânî taraflarından husûs-ı âti’z-zikre vekîl olup mahzar-ı hasm-ı câhidde mezbûretânın zâtlarını ma‘rifet-i şer‘iyye ile ârifân olan Salih Efendi b. Bayram ve Mehmed Ağa b. Kurd nâm kimesneler şehâdetleri ile şer‘an vekâleti sâbite olmağla vekâleten ve mezbûr Fazlı Bey dahi asâleten ve merkūme Neslihân’ın tarafından husûs-ı câ’i’l-beyâna vekîl olup kezâlik şâhidân-ı mezbûrân şehâdetleri ile hasm-ı câhid mahzarında şer‘an vekâleti sâbite olan zevci Hüseyin Beşe b. Zeynelâbidin nâm kimesne dahi vekâleten meclis-i mezbûrda takrîr-i kelâm ve ta‘bîr ani’l-murâd edüp menzil-i mezbûr târih-i kitâba gelince beynimizde iktisâm olunmamış idi hâlâ ba‘de’l-keşf ani’l-müşâhede menzil-i mezbûr beynimizde taksîm olunmasın taleb ederiz dediklerinde mi‘mârân-ı mezbûrân zikr olunan odaları ve hadîkayı ve bi’r-i mâyi ve zikri sebk eden bir bâb tahtânî odayı ve bi’r-i mâ-i mersûm tarafında olan arsayı ve fırın kurbünde olan arsayı münferiden mesâha eylediklerinde mârrü’l-beyân odalar binâ ve zemîn tûlen yirmi dört zirâ‘ ve arzen on [71a] buçuk zirâ‘ be-hesâb-ı şatrancî cemî‘an iki yüz altmış dokuz zirâ‘ olup beher zirâ‘ı yüz otuzar akçeden cem‘an otuz beş bin iki yüz otuz dokuz akçe ve hadîka-i merkūme tûlen elli zirâ‘ ve arzen otuz dokuz zirâ‘ be-hesâb-ı merkūm bin dokuz yüz doksan dokuz zirâ‘ olup beher zirâ‘ı yirmi beşer akçeden cem‘an kırk bir bin yedi yüz altmış dokuz akçe ve bi’r-i mâ’-i mersûm tarafında olan arsa tûlen yirmi üç zirâ‘ ve arzen on zirâ‘ be-hesâb-ı mezbûr iki yüz otuz zirâ‘ olup beher zirâ‘ı yirmişer akçeden cem‘an dört bin sekiz yüz otuz akçe ve fırın kurbünde olan arsa tûlen dokuz zirâ‘ ve arzen beş zirâ‘ be-hesâb-ı mezkûr kırk beş zirâ‘ olup beher zirâ‘ı yirmişer akçeden cem‘an dokuz yüz kırk beş akçe ve cüdrân-ı erba‘ada olan taş duvar tûlen ve arzen be-hesâb-ı terbî‘î dokuz yüz doksan zirâ‘ olup beher zirâ‘ı otuzar akçeden otuz bin dokuz yüz altmış dokuz akçe ve zikri mürûr eden bir bâb tahtânî oda üç bin altı yüz kırk beş akçe ki cem‘an yüz on yedi bin üç yüz doksan yedi akçeye nükūd ve tahmîn eylediklerinden sonra menzil-i mezbûr bi’l-kıymet merkūmûnun beynlerinde taksîm olundukda mezbûrân Bayram Beşe ve Gülâbî Mehmed Çelebi mülklerine muttasıl hadîkadan hadîka-i sultâniye tarafından bir başı on üç zirâ‘ ve tarîk-i âmdan sekiz zirâ‘ ve be-hesâb-ı mezkûr cem‘an yüz beş zirâ‘ taş duvar ve yine tûlen kırk sekiz zirâ‘ ve kadden beş zirâ‘ be-hesâb-ı merkūm iki yüz kırk zirâ‘ taş duvar ve tûlen kırk sekiz zirâ‘ ve arzen on buçuk zirâ‘ be-hesâb-ı merkūm beş yüz elli iki zirâ‘ hadîkayı ve zikr olunan bir bâb tahtânî odayı ve sofa müvekkile-i mezbûre Neslihân’ın hissesine ta‘yîn ve ifrâz olunmağın kıymetleri hesâb olundukda merkūme Neslihânın hissesi kıymeti sekiz bin yedi yüz yedi akçe zâid olup müvekkiletân-ı merkūmetân Ümmühânî ve Havvâ ile mezbûrân Cafer Bey ve Fazlı Bey’e redd ü teslîm lâzım geldikden sonra mezbûrân Cafer Bey ve Fazlı Bey meclis-i merkūmda mezbûre Neslihân’ın vekîli mersûm Hüseyin Beşe mahzarında her biri asâleten ve vekâleten ikrâr ve takrîr-i kelâm edüp mezbûre Neslihân’ın hissesinde zâid olan meblağ-ı mezbûr sekiz bin yedi yüz yedi akçeden dört bin akçesini müvekkile-i mezbûre Neslihân yedinden alıp kabz edüp bâkī kalan dört bin yedi yüz yedi akçeden mezbûrenin zimmetini ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ mahallinde bi’t-taleb ketb ve tahrîr olundu. Tahrîren fi’l-yevmi’s-sâmin min-Şevvâli’l-mükerrem [71b] [li]-sene isneyn ve sittîn ve elf min hicreti men lehü’l-izzü ve’ş-şeref. Şühûdü’l-hâl: Yahya Çelebi b. Nasûh, el-Hâc Hasan b. Ali, Yusuf b. Abdi, Mustafa b. Mehmed, Ahmed b. Receb, Mehmed Çelebi b. Ramazan ve gayruhüm.