Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 192 Hüküm no: 230 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gevher bt. Ahmed’in mülk menzilini kızı Rabia bt. Yakub’a hibe ettiği Mahrûse-i Galata muzâfâtından kasaba-i Beşiktaş’a tâbi‘ Kuruçeşme nâm karyede sâkine Gevher bt. Ahmed nâm hatun mahfil-i kazâda sadriye kebîre kızı râfi‘atü hâze’l-kitâb Râbia bt. Yakub mahzarında ikrâr ve i‘tirâf edüp karye-i mezbûrede vâki‘ bir tarafı Zaharyazi mülkü ve bir tarafı Todori nâm zimmî mülkü ve bir tarafı bazen Hüseyin Çelebi ve bazen Cafer Reis mülkleri ve bir tarafı tarîk-i âm ile mahdûd üç bâb fevkānî odayı ve sofayı ve dehlîzi ve tahtında mahzeni ve tahta sırayı müştemil mülk menzilimi kızım mezbûre Râbia’ya ba‘de’t-tahliyeti’ş-şer‘iyye hibe-i sahîha-i şer‘iyye ile hibe ve temlîk ve teslîm edüp ol dahi vech-i muharrer üzere menzil-i mezbûru meclis-i hibede ittihâb ve temellük ve kabz ve tesellüm eyledi min-ba‘d menzil-i mahdûd-ı mezkûr merkūme Râbia’nın mülk-i mevhûbesi olmuşdur keyfe mâ teşâ ve tehtâr mutasarrıfe olsun dedikde mukırre-i mezbûreyi ber-vech-i meşrûh câriye ve sâdıre olan ikrârında el-mukarru lehâ’l-mezbûre Râbia bi’l-müvâcehe tasdîk bi’l-müşâfehe tahkīk etmeğin mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene isneyn ve sittîn ve elf. Şühûdü’l-hâl: Musa Çelebi b. Mehmed, İsmail b. Hasan, Hasan Ağa b. Abdullah, Mehmed Beşe b. Şaban, Ömer Çelebi b. Hüseyin, Mehmed Beşe b. Abdullah, Osman b. Hüseyin, Mehmed Çelebi b. Osman, Kara Ali b. Ebûbekir.