Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 193 Hüküm no: 232 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Oruç’un Hüseyin b. Abdullah’a bıçakla saldırdığı Mahmiye-i Galata muzâfâtından kasaba-i Beşiktaş’da Sinanpaşa mahallesinde sâkin Hüseyin b. Abdullah nâm kimesne mahfil-i kazâda Mehmed b. Oruc nâm kimesne muvâcehesinde üzerine takrîr-i kelâm edüp târih-i kitâb günü mezbûr Mehmed kasaba-i mezbûre sûkunda bi-gayrı vechin üzerime bıçak çıkarıp urmak murâd eylediğinde Müslümânlar elinden halâs eylediler suâl olunup mûcib-i şer‘îsi icrâ olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan da‘vâsına muvâfık beyyine taleb olundukda udûl-i Müslimînden Mustafa Çelebi b. Süleyman ve diğer Mustafa Çelebi b. Hasan ve Ahmed Çelebi b. Ali Efendi ve Mehmed Çelebi b. Hasan nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ târih-i kitâb günü mezbûr Mehmed bizim huzûrumuzda müdde‘î-i merkūm Hüseyin’in üzerine bi-gayrı vechin bıçak çıkarıp urmak murâd eylediğinde Müslümânlar elinden halâs eylediler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: Mahmud Ağa b. Mehmed, Ramazan Beşe b. Hüseyin, Osman Efendi b. Hüseyin, Seydi Ahmed b. İbrahim ve gayruhüm.