Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 194 Hüküm no: 234 Orijinal metin no: [72b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Kapudan b. Şa‘bân Kapudan’ın bey‘ bi’l-istiğlâl yoluyla Mehmed b. Bayram adlı küçüğün vasîsinden ödünç para aldığı Husûs-ı âti’l-beyânın mahallinde tahrîri iltimâs olunmağın mahrûse-i Galata tevâbi‘inden Beşiktaş mahkemesi küttâbından mevlânâ Hızır Efendi irsâl olunup o dahi zeyl-i kitâbda mastûrü’l-esâmî olan ricâl ile kasaba-i mezbûre mahallâtından Sinanpaşa mahallesinde vâki‘ ve tafsîli câi’z-zikr menzile varup akd-i meclis-i şer‘-i şerîf ettiğinde fahrü’l-akrân Mustafa Kapudan b. Şa‘bân Kapudan şöyle ikrâr ve i‘tirâf eyledi ki, işbu akdin kendilerinden sudûruna kadar mâliki olduğu ve taht-ı tasarrufunda bulundurduğu, mahalle-i merkūmede kâin, hudûdu bir tarafından Mehmed Çelebi b. Ahmed mülkü, bir tarafından İsmail Efendi Vakfı, bir tarafından bâyi‘-i mersûm mülkü, bir tarafından sâhil-i bahr ile mahdûd bulunan, tahtânî beş bâb büyût-i müte‘addideyi ve iki buzhâneyi müştemil cemî‘ menzilini cümle tevâbi‘i ve levâhıkı ve kâffe-i menâfi‘i ve merâfıkıyla râyicü’l-vakt beş yüz riyâlî guruş semen-i mu‘ayyen-i makbûzla Mehmed b. Bayram nâm sagīre zabt-ı emvâli için kıbel-i şer‘den mansûb vasî olan hâmil-i hâze’r-rakīm Sefer Beşe b. Yusuf’a îcâb ve kabûlü hâvî bey‘ ile bey‘ eyledi. O dahi sagīr-i mezbûr malıyla ve istiğlâl maksadıyla menzil-i mezkûru iştirâ eyledi. Bâyi‘-i mezbûrun istîcârı üzere vasiyy-i mezkûr zeyl-i vesîkada muharrer târîhden bir sene tamâmına yüz riyâlî guruş ücret-i kirâ ile menzil-i mezkûru ba‘de’t-tahliye ve’t-tekābüz, kendisine icâreye verdi. Vâki‘ ikrâr müşterî-yi mezbûr tarafından vicâhen ve şifâhen tasdîk edildi. Cerâ zâlike ve hurrire fi’l-yevmi’l-hâmis aşere min-Şevvâli’l-mükerrem li-sene isneteyn ve sittîn ve elf. Şühûdü’l-hâl: Yusuf Beşe b. Abdullah, Mehmed Çelebi b. Ebîbekir, Mehmed Çelebi b. Ahmed Efendi, Receb Çavuş b. Abdurraûf, Sâlih Çelebi b. Bâli, Mehmed Çelebi b. Bayram, Receb Çelebi b. Mehmed, Mahmud Reis [b.] Yusuf, Mustafa Beşe b. Mehmed