Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 195 Hüküm no: 235 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’ın Andon b. Nikola’nın kendisini dövdüğünü ispat edemediği Mahrûse-i Galata’ya tâbi‘ kasaba-i Beşiktaş sâkinlerinden Mehmed b. Abdullah nâm kimesne mahfil-i kazâda kasaba-i merkūmeden bostancı tâifesinden işbu râfi‘ü hâze’l-kitâb Andon v. Nikola nâm zimmî muvâcehesinde üzerine da‘vâ ve takrîr-i kelâm edüp mezbûr Andon bundan akdem bi-gayrı vech-i şer‘î haşeb-i kebîr ile beni darb eyledi suâl olunsun dedikde gıbbe’s-suâl mezbûr Andon müdde‘î-i merkūmu ber-vech-i muharrer darb edüp eylediğini inkâr birle cevâb vericek müdde‘î-i mezbûrdan da‘vâsına mutâbık beyyine taleb olundukda isbât-ı beyyineden izhâr-ı kemâl-i acz edüp istihlâf etmeğin merkūm Andon’a işbu müdde‘î-i mezbûru haşeb ile urup darb eylemediğine yemîn teklîf olundukda ol dahi alâ-vefkı’l-mes’ûl yemîn billâhi’llezî enzele’l-İncîle alâ-İsa aleyhisselâm etmeğin mezbûr Mehmed’i merkūm Andon’a bî-vech mu‘ârazadan men‘ birle mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâbi‘ aşer min-Şevvâli’l-mükerrem [li]-sene isneyn ve sittîn ve elf. [73a] Şühûdü’l-hâl: Mehmed Çelebi b. Ramazan, Mustafa b. ( ), Cafer b. ( ), Ahmed b. ( ).