Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 196 Hüküm no: 236 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey b. İbrahim ile kız kardeşi Mümine’nin Ortaköy’deki bağlarını Panayot v. Yani’ye sattıkları Mahrûse-i Galata hâricinde Hoca Ali mahallesi sâkinlerinden iken bundan akdem müteveffâ olan İbrahim Bey nâm kimesnenin verâseti sulbî kebîr oğlu İsmail Bey ve sulbiye kebîre kızı Mümine nâm hatuna münhasıra olduğu şer‘an zâhir ve müte‘ayyin oldukdan sonra mezbûr İsmail Bey kendi tarafından asâleten ve mezbûre Mümine tarafından husûs-ı âti’l-beyâna vekîl olup mahzar-ı hasm-ı câhidde nehc-i mu‘teber-i şer‘î üzere şer‘an vekâleti sâbite olmağla meclis-i şer‘-i hatîr-i lâzımü’t-tevkīrde işbu râfi‘ü’l-vesîka Panayot v. Yani nâm zimmî muvâcehesinde takrîr-i kelâm ve ta‘bîr ani’l-merâm edüp babam müteveffâ-yı mezbûr İbrahim Bey’den bi-hasebi’l-irsi’ş-şer‘î bize intikāl edüp mahrûse-i merkūme muzâfâtından kasaba-i Beşiktaş’a tâbi‘ Ortaköy nâm karye bağları sınırında Kasımtolusu nâm mevzi‘inde vâki‘ bir tarafı Dimitri v. Vasil nâm zimmî mülkü ve bir tarafı Dimitri bağı ve bir tarafı müteveffâ-yı mezbûr bağı ve bir tarafı tarîk-i âm ile mahdûd tahmînen beş dönüm harâb bağı mezbûr Panayot’a üç bin üç yüz fıddî râyic [fi’l]-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezbûr üç bin üç yüz akçei müşterî-i mezbûrun yedinden tamâmen ahz u kabz eyledik min-ba‘d zikr olunan bağ-ı mezbûr Panayot’un mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde mukırr-ı mezbûrun asâleten ve vekâleten cârî ikrârını el-mukarru lehü’l-mezbûr Panayot vicâhen ve şifâhen tasdîk ve tahkīk etmeğin mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâbi‘ aşer min-Şevvâli’l-mükerrem [li]-sene isneyn ve sittîn ve elf. Şühûdü’l-hâl: Arslan Beşe b. Hasan, Hasan b. Abdullah, Mehmed odabaşı, Receb Beşe b. Hasan, Ahmed b. Hasan, Mustafa Çelebi el-Hâc, Mehmed, Mustafa.