Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 196 Hüküm no: 237 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa b. Yakub’un karanfil bedelinden Çiçekçi Bayram b. Abdünnebi’den 2.550 akçe alacağı olduğu Mahrûse-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden işbu bâ‘isü’l-kitâb el-Hâc Mustafa b. Yakub mahfil-i kazâda çiçekçi tâifesinden Bayram b. Abdünnebi nâm kimesne mahzarında üzerine da‘vâ ve takrîr-i kelâm edüp bundan akdem mezbûr Bayram’a kendi bahçemde amelim ile hâsıl eyleyüp ba‘de’l-kal‘ mâlik olduğum cüce ta‘bîr olunur karanfilimin beher tanesi birer buçuk akçe olmak üzere cem‘an iki bin beş yüz elli akçeye bin yedi yüz karanfilimi ve yine mor ve âl ta‘bîr olunur karanfilimin iki tanesi bir akçeye olmak üzere beş yüz akçeye bin tane karanfilimi cem‘an üç bin elli akçeye bey‘ ve teslîm ol dahi ber-vech-i muharrer üzere iştirâ ve tesellüm eyledikden sonra semen-i mezbûrdan bin akçesini mezbûrun yedinden alıp kabz edüp bâkī zimmetinde iki bin beş yüz elli akçe hakkım kalmışdır hâlâ taleb ederim suâl olunsun dedikde gıbbe’s-suâl mezbûr Bayram cevâbında müdde‘î-i mezbûrdan [73b] zikr olunan bin yedi yüz cüce karanfilini ve bin mor ve âl karanfilini bana vech-i muharrer üzere bey‘-i kat‘î ile bey‘ etmeyip ancak tarafından vekâleten bey‘ eyle deyü teslîm etdikde ben dahi zikr olunan karanfilleri bey‘ eylediğimde cem‘an iki bin akçe hâsıl olup semen-i mezbûrdan bin akçesini yedine teslîm edüp bâkī zimmetimde bin akçe hakkı kalmışdır ve bu zikr olunan cüce karanfili birer buçuk akçeye ve mor ve âl karanfilin ikisini bir akçeye iştirâ eylediğini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden Mustafa Çelebi b. Mehmed ve Hüseyin Çelebi b. Perviz nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr bizim huzûrumuzda bin yedi yüz cüce karanfilini beher tanesi birer buçuk akçeden cem‘an iki bin beş yüz elli akçeye ve bin mor ve âl karanfilinin ikisini bir akçeden beş yüz akçeye mezbûr Bayram’a bey‘-i kat‘î ile bey‘ ve teslîm ol dahi iştirâ ve kabz ve tesellüm edüp vech-i meşrûh üzere beynlerinde akd eylediler biz husûsa vech-i muharrer üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın mûcebince ba‘de’t-tenbîh mâ-vaka‘a ketb olundu. Tahrîren fi’l-yevmi’s-sâlis aşer min-Şevvâli’l-mükerrem [li]-sene isneyn ve sittîn ve elf min hicreti men lehü’l-izzü ve’ş-şeref. Şühûdü’l-hâl: Mustafa Beşe b. Mehmed, Mehmed Çelebi b. Mahmud, diğer Mehmed Çelebi b. ( ), Cafer Bey b. Mehmed, Ahmed Çelebi b. ( ).