Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 197 Hüküm no: 238 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Efendi b. Şaban Efendi’nin Perizat Hatun Vakfı’ndan aldığı borç karşılığında evini ve dört adet dükkânını rehin verdiği Mahrûse-i Galata hâricinde Perizat Hatun mahallesi sükkânından umdetü’l-kuzâti’l-İslâm zübdetü vülâti’l-enâm Yusuf Efendi b. el-merhûm Şaban Efendi meclis-i şer‘-i hatîr-i lâzımü’t-tevkīrde mefharü erbâbi’t-tahrîr ve’l-kalem zübdetü ashâbi’t-takrîr ve’r-rakam Mehmed Efendi b. Mustafa mahzarında takrîr-i kelâm edüp mahalle-i mezbûrede vâki‘ merkūme Perizat Hatun Vakfı’ndan ücret-i mü’eccele-i ma‘lûme ve ücret-i mu‘accele-i mu‘ayyene ile mutasarrıf olduğum bir tarafı Mehmed Efendi veresesi[nin] mutasarrıf olduğu menzil ve bir tarafı Emin Mehmed Çelebi veresesi[nin] mutasarrıf olduğu menzil ve bir tarafı merkūme Perizat Hatun câmi‘-i şerîfi ve bir tarafı tarîk-i âm ile mahdûd menzilimi ve tahtında vâki‘ dört bâb dükkânımı mûmâ-ileyh Mehmed Efendi’ye üç yüz guruş ve çuka bahâsından kırk guruş ki cem‘an üç yüz doksan kıt‘a riyâlî guruşa bi-tarîki’r-rehn vakf-ı merkūm mütevellîsi ma‘rifetiyle ifrâğ ve tefvîz eylediğimde ol dahi ber-vech-i mübeyyen tefevvüz ve kabûl eyledikden sonra mukābele-i ferâğda meblağ-ı merkūmu yedinden bi’t-tamâm alıp kabz eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâdis aşer min-Şevvâli’l-mükerrem [li]-sene isneyn ve sittîn ve elf. Şühûdü’l-hâl: Ahmed Çelebi b. Abdurrahman, Musa Bey çukadâr, Mustafa Bey el-cündi, Hasan Bey el-cündi ve gayruhüm.