Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 101 Hüküm no: 104 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzade Sultan Mehmed Han Evkafı’ndan olup Defter-i hakani Emini Yusuf’un iltizamında bulunan Maltepe ve tevabii mukataasının gelirlerinin eksiksiz olarak toplanması Kıdvetü’n-nüvvâbi’l-müteşerri‘în Kartal nâibi mevlânâ -zîde ilmühû- tevkī‘-i refî‘-i hümâyûnum vâsıl olıcak ma‘lûm ola ki Haremeyni’l-muhteremeyne tâbi‘ evkāfdan İslambol’da vâki‘ merhûm ve mağfûrun-leh Şehzâde Sultân Mehmed Han -tâbe serâhu- evkāfı mukāta‘atından olup ...? karyede mahdûd mâlikâne uhdesinde olan Maldepe ve tevâbi‘i mukāta‘asının defter-i hakānîde hâsılı tahtında öşr-i mâhî ve resm-i dönüm ve bağātu harâc[ına] tahrîr ve hâsıl kaydolunmakdan nâşî sayd olunan mâhînin öşrü ile mevcûd bulunan bağların iktizâ eden resm-i dönümleri kānûn-ı defter-i hakānî mûcebince cem‘ ü tahsîl olunmak iktizâ eder iken ba‘zıları mugāyir-i defter-i hakānî îcâb eden öşr-i mâhî ve resm-i dönüm-i bağātın edâsında ta‘allül ve muhâlefet ve bu takrîb ile mâl-ı mukāta‘aya irâs-ı kesr ve noksân hasâret edüp ihtilâl-i nizâm-ı mukāta‘aya bâdî olmalarıyla fîmâ-ba‘d kānûn ve defter-i hakānî ve kadîmden olageldiği üzere [24a] nizâm üzere lâzım gelen öşr-i mâhî ve resm-i dönüm-i bağāt ve sâir hisse-i rüsûmât ve âidâtı cem‘ u tahsîl olunup mugāyir-i kānûn ve defter-i hakānî hiç ferd ta‘allül ve muhâlefet etdirilmemek üzere emr-i şerîfim sudûrunu istid‘â ve an-evkāf-ı merhûm ve mağfûrun-leh Şehzâde Sultân Mehmed Han -tâbe serâhu- yazıldığı mahâllinde Cezîre-i Girid’e tâbi‘ ortakçılar ve harâc[cı]yân re‘âyâ ile karye-i Maldepe ve el-mahsûl ve tahtında öşr-i hıyar ve kendü öşr-i mâhî ve dönüm-i bağātı fî sekizer akçe ve hınta yekûn ma‘a gayruhû on dört bin yedi yüz on beş akçe yazu ve yine karye-i mezbûr tahtında üç yüz yirmi iki dönüm bağāt ve kurâ-i sâire ile defter-i evkāfda muharrir kalemiyle tahrîr ve defter olunmuşdur bu takdirce karye-i mezbûrenin öşr-i mâhî ve dönüm-i bağāt ve sâir mahsûlâtı vakf-ı mezbûr tarafından zabtolunmak iktizâ eylediğini iftihârü’l-emâcid ve’l-ekârim defter-i hakānî-i âmirem emîni el-Hâc Yusuf -dâme mecdühû- arzetmekle mukāta‘a-i mezbûr senevî dört bin iki yüz elli guruş mâl ile mîr-i mûmâ-ileyhin mâlikâne uhdesinde olduğu Haremeyn muhâsebesinden derkenâr olunmağla emîn-i mûmâ-ileyhin arzı mûcebince emr-i şerîfim verilmek bâbında iftihârü’l-ümerâ ve’l-ekâbir müstecmi‘u cemî‘u’l-meâlî ve’l-mefâhir bi’l-fi‘il başdefterdârım Sarim -dâme uluvvuhû- telhîs etmekle imdi telhîs mûcebince amel olunmak bâbında fermân-ı âlîşânım sâdır olmuşdur buyurdum ki hükm-i şerîfim vardıkda bu bâbda sâdır olan emrim üzere amel edüp defter-i mukāta‘a-i mezkûr ber-vech-i mâlikâne mûmâ-ileyhin uhdesinde olup karye-i mezbûrenin öşr-i mâhî ve dönüm-i bağāt mukāta‘a-i mezbûra hâsıl kaydolunmağla ber-mûceb-i defter-i hakānî karye-i mezbûrede hâsıl olan öşr-i mâhî ve dönüm-i bağāt ve sâir mahsûlât ve rüsûmâtını mukāta‘a-i mezbûra mutasarrıfı tarafından zabt u rabt ve ahz u kabz ve cem‘ u tahsîl etdirdüp mugāyir-i emr-i âlîşân kimesneye ta‘allül ve muhâlefet etdirmeyüp izâ‘at-ı emvâl-i mîrîden be-gāyet ihtirâz ve mücânebet eyleyesin şöyle bilesin alâmet-i şerîfe i‘timâd kılasın ve’s-selâm. Tahrîren fi’l-yevmis-sânî ışrîn Şa‘bân li-sene ihdâ ve semânîn ve mi’ete ve elf.