.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 183
Hüküm no: 137
Orijinal metin no: [38a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


İlbasanlı Ali Ağa’ya olan borcunu ödemesi hususunda Abdüsselam Ağa’ya tenbihte bulunulması

Ma‘rûz-ı dâ‘î-i Devlet-i aliyyeleridir ki

Medîne-i Üsküdar’da sâkin bâ‘isü’l-i‘lâm İlbasanlı Ali Ağa b. Mehmed nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine mahsûs dâirede akdolunan meclis-i şer‘-i münîrde sefine reislerinden Abdüsselam Ağa b. Ali nâm kimesne muvâcehesinde Anadolu’da Bolu sancağında vâki‘ mukaddemâ Hisarönü kazâsı a‘yânı İsmail Ağa b. İsmail hâzır olduğu hâlde bin iki yüz elli iki senesi Zilka‘deti’ş-şerîfesi’nin yirmi üçüncü günü zikr olunan Bolu sancağı mütesellimi’nin kavasbaşı iken a‘yân-ı merkūm İsmail Ağa zimmetinde cihet-i karzdan bâ-temessük alacak hakkım olan üç bin yedi yüz guruşun temessükünü işbu hâzır bi’l-meclis Nuri Ağa yediyle mezbûr Abdüsselam Ağa’ya teslîm ve meblağ-ı mezkûr üç bin yedi yüz guruşu hâzır-ı a‘yân-ı mezbûr İsmail Ağa’dan tahsîl ve kabza tarafımdan merkūm Abdüsselam Ağa’yı tevkîl eylediğimde ol dahi ba‘de kabûlü’l-vekâle meblağ-ı mezkûr üç bin yedi yüz guruşu hâzır-ı a‘yân-ı merkūm İsmail Ağa’dan bi’l-vekâle tamâmen tahsîl ve kabz ve bana vermeyip bi-gayr-ı hakkın kendi umûruna sarfla istihlâk etmekle meblağ-ı mezkûr üç bin yedi yüz guruşu merkūm Abdüsselam Ağa’dan hâlâ taleb ederim deyü hâzır-ı a‘yân-ı merkūmun tasdîkiyle da‘vâ etdikde ol dahi cevâbında inkâr etmekle müdde‘î-i mezbûr ber-vech-i muharrer müdde‘âsını her biri mahallerinden lede’t-tezkiye adl ve makbûlü’ş-şehâde idükleri ihbâr olunan sâlifü’z-zikr Hisarönü kazâsına tâbi‘ Çormanlı karyesi ahâlîsinden Çınaroğlu Ali b. Ali ve Gök Mehmed oğlu İbrahim b. Memiş nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mezkûr üç bin yedi yüz guruşu müdde‘î-i merkūm Ali Ağa’ya edâya mezbûr Abdüsselam Ağa’ya tenbîh olunduğu tescîl ve huzûr-ı âlîlerine i‘lâm olundu. El-emru li-men-lehü’l-emrindir.

Fî 21 Z sene [12]56.