|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 184 Hüküm no: 138 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Araboğlu Bedros’un varisleri arasında anlaşma sağlanması
Ma‘rûz-ı dâ‘î-i Devlet-i aliyyeleridir ki
Medîne-i Üsküdar’da Yenimahalle’de mütemekkin iken bundan akdem hâlik olan Kireçci Araboğlu Bedros v. Oseb zimmînin verese-i münhasırasından sulbiye kızı mukaddemâ sagīre ve hâlâ kebîre sâhibe-i arzuhâl şahsı mu‘arrefe Harob Nasrâniye bi’l-ma‘iyye rü’yete memûr evkāf müfettişi fazîletlü semâhatlü Mîr Mehmed Emin Âsaf Efendi tarafından meb‘ûs Kâtib Ali Rıza Efendi hâzır olduğu hâlde Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde anası ve hâl-i sugrunda bâ-hüccet vasiyy-i mansûbesi olup derûn-ı arzuhâlde mastûretü’l-ism kezâlik mu‘arrefetü’z-şahs Norla bt. Duyun nâm Nasrâniye muvâcehesinde anam mersûme Norla Nasrâniye benim hâl-i sugrumda tesviye-i umûruma vasiyy-i mansûbem olmağla babam hâlik-i mersûmdan mevrûs ve müntakil ber-mûceb-i defter-i kassâm ve zeyl malım olan cem‘an üç bin beş yüz yirmi beş guruş otuz üç parayı anam mersûme Norla Nasrâniye bi’l-vesâye ahz u kabz ve bilâ-zarûre kendi umûruna sarfla istihlâk etmekle meblağ-ı mezkûru anam mersûme Norla Nasrâniyeden bi’l-verâse tazmîn taleb ederim deyü bundan akdem taleb ve da‘vâya tasaddî etmiş idim. El-hâletü hâzihî muslihûn tavassutuyla beynimiz tesviye ve tanzîm olunup ben ber-vech-i muharrer tasaddî eylediğim üç bin beş yüz yirmi beş guruş otuz üç para müdde‘âmdan rızâmla meccânen fâriğa olduğumda anam mersûme Norla Nasrâniye dahi Haremeynü’ş-şerifeyn Hazîne-i celîlesinden mazbût olup Ayasofya-i kebîr Câmi‘-i şerîfi Evkāfı mülhakātından Dârüssa‘âdeti’ş-şerîfe ağası esbak merhûm İdris Ağa Vakfı musakkafâtından medîne-i Üsküdar’da Çinili Câmi‘-i şerîfe kurbünde Reisler mahallesinde kâin ma‘lûmü’l-hudûd bir bâb Horasancı dükkânı derûnunda mevcûde gedik ta‘bîr olunur beher şehr kırk beş akçe icâre-i müecceleli âlât-ı lâzıme-i ma‘lûmede beher şehr yirmi iki buçuk akçe icâre ile [38b] işbu bir kıt‘a diğer arzuhâl hâmişinde mastûr defter-i vakıfdan muhreç derkenâr nâtık olduğu üzere mutasarrıfe olduğu nısf hisse-i şâyi‘asını bâ-re’y-i mütevellî meccânen bana ferâğ ve tefvîz eylediğinde ben dahi ber-vech-i muharrer tefevvüz ve kabûl eylediğimden sonra meblağ-ı mezkûr üç bin beş yüz yirmi beş guruş otuz üç paranın mutâlebesine ve babam hâlik-i mersûmun dâhil-i defter ve hâric-ez defter tereke-i ma‘lûme ve mechûlesine ve hukūk-ı mîrâsa ve işbu târîhe gelince sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mütâlebâtdan anam mersûme Norla Nasrâniye’nin zimmetini, ol dahi kezâlik husûs-ı mezkûre ve ferâğ-ı mezbûrda şürût-ı müfside müdde‘âsına ve işbu târîhe gelince sâir cemî‘ hukūk-ı şer‘iyyeye müte‘allika âmme-i de‘âvîden benim zimmetimi her birimiz ibrâ-i âmm-ı sahîh-i şer‘î ile kabûlü hâvî ibrâ ve iskāt edip bu vechile kat‘-ı münâza‘a eyledik deyü mukırra-i mersûme Harob Nasrâniyenin bi’l-cümle kelimât-ı meşrûhasını anası mesfûre Norla Nasrâniyenin tasdîk eylediği tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 25 Z sene [12]56.
|