Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 198 Hüküm no: 239 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’a kocası Ali b. İbrahim ile iyi geçinmesi için tavsiyede bulunulduğu Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sükkânından Ali b. İbrahim nâm kimesne mahfil-i kazâda zevce-i menkûhası Safiye bt. Abdullah nâm hatun mahzarında takrîr-i da‘vâ edüp mezbûre Safiye benim zevce-i menkûham iken benimle izdivâcdan imtinâ‘ eder suâl olunup savb-ı şer‘den hüsn-i mu‘âşeret üzere olmasına tenbîh olunmasın taleb ederim dedikde gıbbe’l-istintâk mezbûre Safiye’nin istimâ‘ [ve] kabûle kābil cevâb-ı şer‘îsi olmamağın merkūmeye zevci mezbûr Ali ile hüsn-i zindegâne üzere olup mu‘âmele-i zevciyyetden imtinâ‘ etmemek üzere tenbîh birle mâ-hüve’l-vâkı‘ bi’t-taleb ketb ve terkīm olundu. Tahrîren fi’l-yevmi’l-ışrîn min-Şevvâli’l-mükerrem [li]-sene isneyn ve sittîn ve elf. Şühûdü’l-hâl: Hızır Efendi el-kâtib, Mehmed Çelebi b. Ramazan, Hüseyin Çelebi b. ( ), Cafer [b.] Mehmed, İbrahim Beşe b. Abdullah ve gayruhüm.