Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 199 Hüküm no: 241 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirepeye bt. Yakomi’nin yarım menzil hissesini oğlu Yorgaki v. Kostantin’e on yedi bin akçeye sattığı Mahrûse-i Galata’ya tâbi‘ kasaba-i Beşiktaş’da Sinanpaşa mahallesi sâkinelerinden Pirepeye bt. Yakomi nâm Nasrâniye mahfil-i kazâ-i lâzımü’r-rızâda sadrî kebîr oğlu işbu râfi‘ü’l-kitâb Yorgaki v. Kostantin nâm zimmî muvâcehesinde ikrâr ve takrîr-i kelâm edüp mahalle-i mezbûrede vâki‘ bir tarafı Arabzâde Mahmud Çelebi bahçesi ve bir tarafı Androça nâm zimmî mülkü ve bir tarafı Corci nâm zimmî mülkü ve bir tarafı tarîk-i âm ile mahdûd iki bâb fevkānî odayı ve tahtında mahzeni ve tahta-pûşu ve zât-ı eşcâr-ı müsmire ve gayr-ı müsmire hadîkayı müştemil menzilimin bundan esbak mezbûr Androça tarafında olan bir bâb fevkānî odayı ve tahtında nısf mahzeni ve tahta-pûşu sadriye kebîre kızım Laharo bt. Kostantin nâm Nasrâniyeye ba‘de’l-ifrâz ve’t-tahliye hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve temellük ve tesellüm etmişidi hâlâ menzil-i mezbûrun nısf-ı âharı olup mezbûr Mahmud Çelebi bahçesi tarafında [74b] olan bir bâb fevkānî odayı ve tahtında nısf mahzeni ve hadîkayı zukak kapısını kızım mezbûre Laharo ile beynlerinde müşterek olmak üzere oğlum mezbûr Yorgaki’ye on yedi bin fıddî râyic [fi’l]-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezbûr on yedi bin akçenin on bir bin akçesini mezbûr Yorgaki’ye deynim olan on bir bin akçe ile takās eyleyüp meblağ-ı bâkī altı bin akçeyi merhûm Hayreddin Paşa Vakfı’na deynim olan altı bin akçe için vakf-ı mezbûr mütevellîsi olan merkūm Mahmud Çelebi’ye rızâ-i muhîl kabûl-i muhtâl ve muhtallün-aleyhi hâvî havâle-i sahîha-i şer‘iyye ile havâle edüp ber-vech-i muharrer semen-i mezbûrdan zimmetimde bir akçe ve bir habbe kalmadı ba‘de’l-yevm zikr olunan bir bâb oda ve tahtında nısf mahzen ve hadîka ve müşterek zukak kapısı mezbûrun mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-hâdî ve’l-ışrîn min-Şevvâl li-sene isneteyn ve sittîn ve elf. Şühûdü’l-hâl: Mefharü’l-akrân Bayram Ağa, Hudâverdi Beşe b. Abdülmennan, Mehmed Çelebi b. Mustafa, Mustafa b. Mehmed, Mehmed b. Ramazan, Mustafa Beşe ve gayruhüm.