|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 185 Hüküm no: 139 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Selime Hatun ve oğlu Kolağası Mahmud’un menzil hissesini sahibi Suyolcu Mehmed Said Ağa’ya teslim etmeleri
Ma‘rûz-ı dâ‘î-i Devlet-i aliyyeleridir ki,
Sâhib-i arzuhâl Suyolcu Mehmed Said Ağa b. Mustafa nâm kimesne bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi kıbelinden meb‘ûs Kâtib es-Seyyid Ali Rıza Efendi hâzır olduğu hâlde Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kendi nefsinden asıl ve vâlidesi zâtı mu‘arrefe Selime Hatun bt. Mustafa tarafından husûs-ı âti’l-beyânda vekîl-i müseccel-i şer‘îsi Asâkir-i Hâssa-i Şâhâne Kolağalarından derûn-ı arzuhâlde mezkûrü’l-ism Mahmud Ağa b. Mehmed muvâcehesinde nezâreti evkāfa mülhak evkāfdan ashâb-ı hayrâtdan merhûm Feridun Ağa Vakfı’nın kāimmakām-ı mütevellîsi ecille-i ricâl-i Devlet-i aliyye’den hâlâ evkāf nâzırı atûfetlü Numan Mahir Beyefendi hazretleri tarafından vekîl-i şer‘îleri câbî-i vakf-ı mezkûr el-Hâc Mahmud Efendi b. el-Hâc Musa hâzır olduğu hâlde vakf-ı mezkûr musakkafâtından medîne-i Üsküdar’da Atîk Vâlide Sultan mahallesinde vâki‘ etrâf-ı erba‘ası Bıçakçı Ali Ağa menzili ve Kömürcü İsmail Ağa menzili ve bahçesi ve tarîk-i âm ile mahdûd şehriye altmış akçe icâre-i müecceleli müştemilât-ı ma‘lûmeyi hâvî bir bâb vakıf menzilin üç hisse i‘tibârıyla sülüsân hissesi işbu hâzırân bi’l-meclis li-ebin er karındaşım Ahmed ve li-ebeveyn kız karındaşım Âişe Sıdıka Hatun’un bâkī sülüs hissesi benim üç kıt‘a temessükât ile bi’l-icâreteyn iştirâken ve şâyi‘an taht-ı tasarrufumuzda iken işbu asîl ve vekîl-i mezbûr Mehmed Ağa ile vâlidesi müvekkile-i mezbûre Selime Hatun’dan her biri karındaşlarım hâzırân-ı mezbûrân Ahmed ve Âişe Sıdıka Hatun’dan her birinin menzil-i mahdûd-ı mezkûrdan ber-vech-i meşrûh mutasarrıflar oldukları sülüsân hisse-i şâyi‘alarını asil ve vekîl-i mezbûrun yedinde olan temessük-i mezkûr hâmişleri mantûklarınca bin iki yüz elli beş senesi Cemâziyelûlâsı’nın yirmi üçüncü günü bedel-i ma‘lûm ve medfû‘ mukābillerinde hâzırân-ı mezbûrândan bâ-re’y-i mütevellî teferru‘ ve tefevvüz eylediklerine mebnî ben târîh-i mezkûrda diyâr-ı âharda bulunmam takrîbiyle benim ber-vech-i muharrer menzil-i mahdûd-ı mezkûrda mutasarrıf olduğum sülüs hisse-i şâyi‘amda asîl ve müvekkil-i mezbûrân bi-gayr-ı hakkın vaz‘-ı yed etmeleriyle suâl olunup kasr-ı yedlerine vâlidesi müvekkile-i mezbûreye izâfetle asîl ve vekîl-i merkūm Mehmed Ağa’ya tenbîh olunmak matlûbumdur deyü da‘vâ etdikde asîl ve vekîl-i merkūm Mehmed Ağa dahi cevâbında menzil-i mahdûd-ı mezkûrun ber-minvâl-i meşrûh sülüsân hisse-i şâyi‘alarını hâzırân-ı merkūmân Ahmed ve Âişe Sıdıka hatundan tefevvüz eylediklerini ve âhar sülüs hisse-i şâyi‘a-i mezkûreye mukaddemâ Suyolcu Mehmed Said Ağa b. Mustafa nâmında bir kimesne bi’l-icâreteyn iştirâken bâ-temessük mutasarrıf olup bir müddetden beri diyâr-ı âharda sâkin iken bilâ-veled fevt olduğuna binâen mutasarrıf olduğu sülüs hisse-i şâyi‘a-i merkūme merkūm Suyolcu Mehmed Said Ağa’nın mahlûlünden târîh-i merkūmda bin beş yüz guruş icâre-i mu‘accele ve icâre-i müeccele-i merkūmeden hissesiyle cânib-i vakf-ı mezkûrdan benimle vâlidem ve müvekkilem merkūme Selime Hatun’a bâ-temessük bi’l-icâreteyn îcâr biz dahi ber-vech-i muharrer istîcâr ve kabûl etmemizle ol vechile bi-hakkın vaz‘-ı yed ederiz deyü sülüs hisse-i şâyi‘a-i mezkûreye vaz‘-ı yedlerini bi’l-asâle ve bi’l-vekâle câbî-i hâzır-ı vekîl-i merkūmun tasdîkiyle ikrâr ve i‘tirâf edip lâkin müdde‘î-i merkūm Mehmed Said Ağa’nın ber-vech-i meşrûh sülüs hisse-i şâyi‘a-i mezkûreye mutasarrıf olan Suyolcu Mehmed Said Ağa olduğunu câbî-i vekîl-i hâzır-ı mezbûr ile ma‘an inkâr etmeleriyle müdde‘î-i mezbûr Mehmed Said Ağa, ber-vech-i muharrer müdde‘âsını her biri lede’t-tezkiye adl ve makbûlü’ş-şehâde idükleri ihbâr olunan Feshâne-i âmire amelesinden İsmail b. Davud ve Devâtçı esnâfından Üveys b. Ali nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince sülüs hisse-i şâyi‘a-i mezkûreden bâ-re’y-i mütevellî kasr-ı yed birle sâhib-i evveli müdde‘î-i merkūm Mehmed Said Ağa’ya teslîme vâlidesi müvekkile-i mezbûre Selime Hatun’a izâfetle asıl ve vekîl-i merkūm Mehmed Ağa’ya tenbîh olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 25 Za sene [12]56.
|