Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 204 Hüküm no: 252 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aknisa v. Preşkova’nın Mehmed Çelebi’nin küçük çocuklarının malından aldığı borç karşılığında menzilini rehin verdiği Mahmiye-i Galata muzâfâtından kasaba-i Beşiktaş’a tâbi‘ Arnavutköyü nâm karye sükkânından Aknisa v. Preşkova nâm zimmî meclis-i şer‘de karye-i mezbûrede sâkin iken bundan akdem müteveffâ olan Mehmed Çelebi b. Ahmed’in evlâd-ı sıgārına kıbel-i şer‘den mansûbe vasîleri olan vâlideleri Bâdyeldân bt. Abdullah nâm hatun tarafından ikrâr-ı âti’l-beyânı tasdîka vekîl olup nehc-i mu‘teber-i şer‘î üzere şer‘an vekâleti sâbite olan es-Seyyid Ali Çelebi b. es-Seyyid Abdülkādir mahzarında ikrâr ve takrîr-i kelâm edüp vasiyye-i mezbûre sıgār-ı merkūme malından on dokuz bin fıddî râyic [fi’l]-vakt akçe istikrâz ve kabz eylediğimde ol dahi ikrâz ve teslîm eyledikden sonra karye-i mezbûrede vâki‘ bir tarafı Sandıkcı mülkü ve bir tarafı mezârlık ve iki tarafı tarîk-i âm ile mahdûd mülk menzilimi meblağ-ı mezbûr mukābelesinde vasiyye-i mezbûreye vaz‘ ve teslîm edüp ol dahi irtihân ve tesellüm eyledi eğer târih-i kitâbdan sene tamâmına değin meblağ-ı mezbûru merkūme Bâdyeldân’a edâ ve teslîmden âciz olur isem menzil-i mezbûru ba‘de’l-müzâyede semen-i misli ile âhara bey‘ eyleyüp meblağ-ı mezbûru istîfâ ve kabz eyledikden sonra fazla kalırsa bana teslîm etmek üzere “küllemâ azeltüke fe-ente vekîlî” mısdâkınca azl [ve] in‘izâlden masûn vekâlet-i devriyye ile mezbûreyi tarafımdan vekîl ve nâib-i menâb nasb ü ta‘yîn eyledim dedikde vekâlet-i mezbûreyi vech-i muharrer üzere kabûl eyledi dedikde gıbbe’t-tasdîki’ş-şer‘î karye-i merkūme sâkinlerinden Yamandi v. Hırsozvirli nâm zimmî meblağ-ı mezbûra tarafeynden emr ü kabûlü hâviye kefâlet-i sahîha-i şer‘iyye ile kefîl olmağın mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: İsmail Beşe b. Hasan, Seyyid Abdulbâki b. Ahmed, Mehmed Bey b. Abdullah, İbrahim b. Abdullah, Süleyman b. Abdullah ve gayruhüm.