Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 205 Hüküm no: 253 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. İbrahim’in kardeşi Emine üzerine açtığı alacak davasında iddiasını ispat edemediği Mahrûse-i Galata muzâfâtından kasaba-i Beşiktaş’da Sinanpaşa mahallesinden Ali b. İbrahim meclis-i şer‘-i hatîr-i lâzımü’t-tevkīrde li-ebeveyn kız karındaşı işbu râfi‘atü’l-kitâb Emine Hatun mahzarında üzerine da‘vâ ve takrîr-i kelâm edüp bundan akdem mezbûre Emine’ye on kıt‘a riyâlî guruş ikrâz ve teslîm edüp ol dahi meblağ-ı mezbûru yedimden istikrâz ve tesellüm etmişidi hâlâ taleb eylediğimde edâda te‘allül eder suâl olunsun dedikde gıbbe’s-suâl ve’l-inkâr mezbûr Ali’den da‘vâsına muvâfık beyyine taleb olundukda ityân-ı beyyineden kemâl-i acz edüp istihlâf etmeğin mezbûre Emine’ye vech-i muharrer üzere bundan akdem karındaşı merkūm Ali’den meblağ-ı mezbûr on guruşu istikrâz ve kabz etmediğine yemin teklîf olundukda ol dahi alâ-vefkı’l-mes’ûl yemin billâhi’l-aliyyi’l-azîm etmeğin merkūm Ali’yi mezbûre Emine’ye bî-vech mu‘ârazadan men‘ birle mâ-hüve’l-vâkı‘ bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Hızır Efendi el-müderris, Mustafa Beşe b. Mehmed, Mehmed b. Ramazan, Cafer b. Mehmed ve gayruhüm.