Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 206 Hüküm no: 254 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Asvador’un Şenlik Dede Vakfı’na bin akçe borcu olduğunu ikrâr ettiği Mahmiye-i Galata muzâfâtından kasaba-i Beşiktaş’da Maçuka mahallesinde vâki‘ Şenlik Dede’nin nükūd-ı mevkūfesine bi’l-fi‘il mütevellî olan İbrahim Çelebi b. Mehmed nâm kimesne mahfil-i kazâya kasaba-i merkūmede Sinanpaşa mahallesi sükkânından Anton v. Asvador nâm Ermeniyi ihzâr ve muvâcehesinde bi’t-tevliye üzerine da‘vâ ve takrîr-i kelâm edüp vakf-ı mezbûr malından merkūm Anton’un zimmetinde fıddî râyic fi’l-vakt bin akçe olmağın taleb eylediğimde vermede ta‘annüd eder suâl olunup alıverilmesi matlûbumdur dedikde gıbbe’s-suâl merkūm Anton cevâbında fi’l-hakīka vakf-ı mezbûra zimmetimde lâzımü’l-edâ ve vâcibü’l-kazâ deynim vardır deyü ikrâr ve i‘tirâf etmeğin mûcibi ile meblağ-ı merkūmu mütevellî-i mezbûra edâya tenbîh birle mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Abdülhalîm Efendi b. Mehmed Efendi el-müderris, Hızır Efendi b. Nasûh el-müderris, huddâm.