Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 206 Hüküm no: 255 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Fatma bt. Abdullah’ın muhallefatının yarısının kocası Dilaver b. Abdullah’a diğer yarısının ise beytülmale ait olduğu Mahrûse-i Galata’da [emîn-i] beytü’l-mâl-ı âmme olan umdetü’l-emâcid ve’l-ekârim Hasan Ağa’nın tarafından vekîl-i sâbitü’l-vekâle olup mahrûse-i mezkûre muzâfâtından kasaba-i Beşiktaş subaşısı olan Ali Bey b. Kemal meclis-i şer‘de kasaba-i merkūme mahallâtından Sinanpaşa mahallesinde sâkine iken bundan akdem müteveffât olan Fâtıma bt. Abdullah nâm hatunun zevc-i metrûkü muhallefâtına vâzı‘ü’l-yed olan Dilaver b. Abdullah nâm kimesne mahzarında bi’l-vekâle ikrâr ve takrîr-i kelâm edüp müteveffât-ı merkūmenin zevci mezbûr Dilaver’den gayrı zâhirde vâris-i ma‘rûfu olmayıp muhallefâtının nısfı zevci mezbûr Dilaver’e ve nısf-ı âharı cânib-i beytü’l-mâl-ı âmmeye olmağın müteveffât-ı merkūmenin mezbûr Dilaver zimmetinde mütekarrir olan dört yüz akçe mehr-i mü’ecceli ile müteveffât-ı mezbûrenin beynimizde ilm-i şer‘î ile ma‘lûm terekesinden beytü’l-mâle âid ve râci‘ olan nısf-ı âhar için mezbûr Dilaver yedinden yüz kırk akçe vekâletim hasebiyle ahz eyledim ba‘de’l-yevm muhallefât-ı müteveffât-ı merkūmeye müte‘allik zevci merkūm Dilaver ile vechen mine’l-vücûh da‘vâ ve nizâ‘ım kalmamışdır dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Veli Beşe b. Mustafa, Mustafa b. Mehmed, Mehmed Çelebi b. Ramazan, Cafer b. Mehmed, Mehmed b. Mahmud, Ahmed b. ( ), İbrahim Beşe b. Ahmed er-râcil ve gayruhüm.