Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 207 Hüküm no: 256 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasakçı Ahmed Beşe b. Musa’nın Ahmed Beşe b. Abdülkerim tarafından hançer ile yaralandığı Mahrûse-i Galata muzâfâtından kasaba-i Beşiktaş’a tâbi‘ Ortaköy nâm karye yasakçılarından Ahmed Beşe b. Musa nâm râcil mahfil-i kazâya diğer Ahmed Beşe b. Abdülkerîm nâm kimesneyi ihzâr ve muvâcehesinde üzerine da‘vâ ve takrîr-i kelâm edüp târih-i kitâbdan bir gün mukaddem karye-i merkūmede üç yol ağzında ismi ma‘lûm değil bir kimesne tülbentçi tâifesinden bir Acem’i bi-gayrı vechin varsak ta‘bîr olunur bıçak ile urup mecrûh eyledi ben dahi cârih-i mezbûru ahz eylediğimde merkūm diğer Ahmed Beşe belimden siyâh saplı hançerimi alıp sol bâzûmu bir yerde ve sağ elimin ayasında bir yerde urup mecrûh eyledi suâl olunup mûcibi icrâ olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan iddiâsını mübeyyine beyyine taleb olundukda udûl-i Müslimînden olup kasaba-i merkūme Sinan Paşa-i Cedîd mahallesinde sâkin Mustafa Bey b. Mehmed ve Mehmed Beşe b. Yahya nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ târih-i kitâbdan bir gün mukaddem karye-i merkūmede üç yol ağzında bizim huzûrumuzda diğer merkūm Ahmed Beşe siyâh saplı hançer ile müdde‘î-i mezbûr Ahmed Beşe’yi sol bâzûsunu ve sağ eli ayasını urup mecrûh eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın vâki‘u’l-hâl bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Nasûh Efendi b. Mustafa el-imâm, Mahmud Çelebi b. Ahmed, Mustafa Çelebi b. İskender, Mustafa Çelebi b. Ahmed ve gayruhüm.