Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 207 Hüküm no: 257 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Paşa’nın azatlı köle ve cariyesi Süleyman ve Vildan’a Beşiktaş’taki elli dönüm tarlasının kullanım hakkını hibe ettiği Husûs-ı âti’l-beyânın mahallinde tahrîri iltimâs olunmağın bu fakīr zeyl-i kitâbda mastûru’l-esâmî olan Müslimîn ile düstûr-ı zî-şân müşîr-i âsaf-nişân râkibü huyûli’l-izzi ve’l-ikbâl sâhibü züyûli’l-mecd ve’l-iclâl emînü’l-emâneti’l-uzmâ semînü’l-hilâfeti’l-kübrâ müdebbirü umûri’s-saltanati fî-âmmeti’l-âfâk câlisü kürsiyyi’l-vezâreti bi’l-istihkāk hazret-i Ahmed Paşa yesserallâhu mâ yeşâ’ ve mâ-yürîduhû hazretlerinin mahrûse-i Galata’ya tâbi‘ kasaba-i Beşiktaş mahallâtından Sultân Süleyman mahallesinde vâki‘ hadîkalarına varup akd-i meclis-i şer‘-i şerîf olundukda vezîr-i müşârun ileyh hazretlerinin taraf-ı karînü’ş-şereflerinden husûs-ı câ’i’z-zikri ikrâra vekîl olup Hüseyin Bey b. Ramazan ve Abdulbâki Bey b. Abdullah şehâdetleriyle şer‘an vekâleti sâbite olup hâlâ başmuhâsebeci olan mefharü erbâbi’t-tahrîr ve’l-kalem zübdetü ashâbi’t-tastîr ve’r-rakam Mehmed Efendi b. Ahmed meclis-i mezbûrda müşârun ileyhin abd-i mu‘takı Süleyman Bey b. Abdullah ve câriye-i mu‘takası Vildan bt. Abdullah nâm hatun mahzarlarında bi’l-vekâle ikrâr ve takrîr-i kelâm edüp müvekkil-i müşârun ileyh hazretleri kasaba-i merkūmede Kozlu? demekle ma‘rûf nâm mevzi‘de vâki‘ bir tarafı hadîka-i sultâniye ve bir tarafı Şeyh Ali Efendi tarlası ve bir tarafı Hadice Hatun tarlası ve bir tarafı vâdi ile mahdûd olup Sultân Bayezid Vakfı’ndan mutasarrıf olduğu tahmînen yirmi dönüm mikdârı tarlasının hakk-ı tasarrufunu mezbûrâna elli kıt‘a riyâlî guruş-ı kebîr mukābelesinde vakf-ı mezbûr mütevellîsi ma‘rifetiyle ferâğ ve tefvîz, onlar dahi ale’l-iştirâki’s-seviy tefevvüz ve kabûl eylediklerinden sonra mukābele-i tefvîz olan meblağ-ı mezbûrü’n-na‘t elli guruşu “hibetü’d-deyn mimmen aleyhi’d-deyn câizün” fehvâsı üzere mezbûrâna hibe-i sahîha-i şer‘iyye ile hibe eyleyüp onlar dahi meclis-i şer‘ de ittihâb ve kabûl eylediler dedikde gıbbe’t-tasdîki’ş-şer‘î mâ-vaka‘a mahallinde bi’t-taleb ketb olundu. Tahrîren fi’l-yevmi’s-sâmin ve’l-ışrîn min-Şevvâl li-sene isneyn ve sittîn ve elf. Şühûdü’l-hâl: Nasûh Efendi b. Mustafa el-imâm, Ali Çelebi el-müezzin, Osman Çelebi b. Nasûh Beşe, Ali Bey b. Kemal, Abdullah b. Abdullah, Mahmud b. Receb, Dilaver Reis b. Abdi, Veli b. Şaban, Ömer b. Halil, Rıdvan b. Abdullah ve gayruhüm.