Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 208 Hüküm no: 258 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Paşa’nın azadlı köle ve cariyesi Süleyman ve Vildan’a Beşiktaş’taki iki yüz elli üç zira arsasını hibe ettiği Husûs-ı âti’l-beyânın mahallinde tahrîri iltimâs olunmağın bu fakīr zeyl-i sahifede mastûru’l-esâmî olan Müslimîn ile düstûr-ı zî-şân müşîr-i âsaf-nişân râkibü huyûli’l-izzi ve’l-ikbâl sâhibü züyûli’l-mecd ve’l-iclâl emînü’l-emâneti’l-uzmâ semînü’l-hilâfeti’l-kübrâ müdebbirü umûri’s-saltanati fî âmmeti’l-âfâk câlisü kürsiyyi’l-vezâreti bi’l-istihkāk hazret-i Ahmed Paşa yesserallâhu mâ yeşâhu ve mâ yürîduhû hazretlerinin mahrûse-i Galata’ya tâbi‘ kasaba-i Beşiktaş’da Sultân Süleyman mahallesinde vâki‘ hadîkalarına varup akd-i meclis-i şer‘-i şerîf olundukda vezîr-i müşârun ileyh hazretlerinin taraf-ı karînü’ş-şereflerinden husûs-ı câ’i’z-zikri ikrâra vekîl olup Hüseyin Bey b. Ramazan ve Abdulbâki Bey b. Abdullah şehâdetleriyle şer‘an vekâleti sâbite olan mefharü erbâbi’t-tahrîr ve’l-kalem zübdetü ashâbi’t-tastîr ve’r-rakam hâlâ başmuhâsebeci olan Mehmed Efendi b. Ahmed meclis-i mezbûrda müşârun ileyhin abd-i mu‘takları Süleyman Bey b. Abdullah nâm kimesne ile câriye-i mu‘takaları Vildan bt. Abdullah nâm hatun mahzarlarında bi’l-vekâle ikrâr ve takrîr-i kelâm edüp müvekkil-i müşârun ileyh mahalle-i mezbûrede vâki‘ bir tarafı Uzun Veli mülkü ve bir tarafı bazen Dilaver Bey ve bazen Ömer Çelebi mülkleri ve tarafeyni tarîk-i âm ile mahdûd tûlen yirmi üç zirâ‘ ve arzen on zirâ‘ be-hesâb-ı şatrancî cem‘an iki yüz elli üç zirâ‘ arsasını mezbûrâna ale’l-iştirâki’s-seviy hibe-i sahîha-i şer‘iyye ile hibe ve temlîk onlar dahi meclis-i hibede ittihâb ve temellük ve tesellüm eylediler ba‘de’l-yevm arsa-i mezkûre merkūmânın ber-vech-i muharrer mülk-i mevhûbudur keyfe mâ yeşââ ve yahtârâ mutasarrıfân olsunlar dedikde gıbbe’t-tasdîki’ş-şer‘î vâki‘ hâl bi’t-taleb mahallinde ketb ve tahrîr olundu. Tahrîren fi’l-yevmi’s-sâmin ve’l-ışrîn min-Şevvâl li-sene isneyn ve sittîn ve elf. Şühûdü’l-hâl: es-Sâbikūn.