|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 187 Hüküm no: 140 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehmed Ağa’nın vefat eden Bağcı Arab Salih Ağa’ya varis olduğunun tescil ve mirastan hissesinin tahsili
Ma‘rûz,
Medîne-i Üsküdar’da Kazasker mahallesi ahâlîsinden olup bin iki yüz elli iki senesi hilâlinde edâ-i farîza-i hacc-ı şerîf için Mekke-i mükerreme’ye azîmet ederken esnâ-i râhda vefât eden Bağcı Arab Salih Ağa’nın ber-vech-i âtî bir kıt‘a isbât-ı verâset hücceti nâtıka olduğu üzere li-ebeveyn ammi oğlunun oğlu ve usûbet-i nesebiye cihetinden verâseti olduğuna hükm-i hâkim-i şer‘î lâhık olan Sarrâc esnâfından derûn-ı arzuhâlde mezkûrü’l-ism Mehmed Ağa b. Osman nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde müteveffâ-yı mezbûrun li-ümmin kız karındaşı olup terekesine bi’l-verâse vâzı‘atü’l-yed olan mu‘arrefetü’z-zât Zeliha Hatun bt. Halil muvâcehesinde Kıbrıs tüccârından kezâlik derûn-ı arzuhâlde ismi mezkûr es-Seyyid Mehmed Nureddin Ağa b. Mustafa nâm kimesne hâzır olduğu hâlde yedimde olup bin iki yüz elli üç senesi Recebi’l-ferdi’nin on yedinci günü târîhiyle müverraha ve ol târîhde medîne-i mezbûre kādısı bulunan mevâlî-i i‘zâmdan fazîletlü es-Seyyid Mehmed Selim Sırrı Efendi’nin imzâ ve hatemini hâviye bir kıt‘a hüccet-i şer‘iyye nâtıka olduğu üzere müteveffâ-yı mezbûr el-Hâc Arab Salih Ağa’nın babası Osman ile benim babam Osman’ın babası Mehmed li-ebeveyn er karındaşlar olup babaları ismi Osman ve dedeleri ismi Kara Ahmed ve vâlideleri ismi Âişe Hatun bt. diğer Osman ve maskat-ı re’sleri Zağferanborlu kazâsına tâbi‘ Kızılbel karyesi olup ol vechile ben müteveffâ-yı mezbûrun li-ebeveyn ammi oğlunun oğlu olmamla verâseti mezbûre Zeliha Hatun ile usûbet-i nesebiye cihetinden bana münhasıra olup benden gayrı tereke-i bakiyesine müstahakk-ı âharı yoğiken mezbûre Zeliha Hatun müteveffâ-yı mezbûrun bi’l-cümle terekesine bi’l-verâse vaz‘-ı yed etmekle makbûzundan hisse-i irsiyemi bana teslîme merkūme Zeliha Hatun’a tenbîh olunmak matlûbumdur deyü kādı-i mûmâ-ileyh huzûrunda mezbûre Zeliha Hatun’dan da‘vâ eylediğimde ol dahi tereke-i müteveffâ-yı mezbûre bi’l-verâse vaz‘-ı yedini ikrâr benim ber-vech-i muharrer verâset müdde‘âmı inkâr etmekle ben ber-minvâl-i muharrer müdde‘âmı derûn-ı hüccet-i merkūmede isimleri mezkûr Taşçı Ali Ağa b. Mehmed ve es-Seyyid Osman Efendi b. Mehmed nâm şâhideyn-i mu‘addileyn şehâdetleriyle muvâcehesinde ber-nehc-i şer‘î isbât edip kādı-i mûmâ-ileyh dahi şâhidân-ı merkūmânın şehâdetlerini kabûl ve mûcebiyle benim verâsetime hükm etmiş idi. El-hâletü hâzihî merkūme Zeliha Hatun vâzı‘atü’l-yed olduğu tereke-i müteveffâ-yı mezbûrdan hisse-i irsiye-i şer‘iyyemi bana teslîmden ibâ vü imtinâ‘ eylediğinden mâ‘adâ müteveffâ-yı mezbûrun hîn-i vefâtında yanında mevcûd bâ-defter terekesi esmânı olup Kıbrıs Adası’nda sâkin el-Hâc Hasan Basri Efendi b. el-Hâc Mehmed Emin nâm kimesnenin ma‘rifet-i şer‘le bi’l-emâne makbûzu olan iki bin üç yüz doksan guruş on parayı merkūm el-Hâc Hasan Basri Efendi işbu hâzır-ı merkūm es-Seyyid Mehmed Nureddin Ağa’yı tarafından tevkîl birle meblağ-ı mezkûru hâzır-ı merkūm ile bize irsâl edip ol vechile meblağ-ı mezkûrdan hisse-i irsiyemi hâzır-ı merkūmdan ahz murâd eylediğimde bî-vech mümâna‘at eder olmağla mümâna‘atı men‘ ve ber-vech-i meşrûh vâzı‘atü’l-yed olduğu tereke-i müteveffâ-yı mezbûrdan dahi hisse-i irsiyemi bana teslîme merkūme Zeliha Hatun’a tenbîh olunmak murâdımdır deyü da‘vâ etdikde merkūme Zeliha Hatun dahi cevâbında eğerçi müdde‘î-i merkūm Mehmed Ağa mûrisim müteveffâ-yı mezbûrun li-ebeveyn ammi oğlunun oğlu ve vârisi olmayıp ecânibden Bağcı Osman’ın oğlu olmağla ol vechile müteveffâ-yı mezbûrun verâseti ancak bana münhasıra ve kâffe-i terekesi dahi bana mevrûs olduğuna binâen tereke-i müteveffâ-yı mezbûra vaz‘-ı yed ve hâzır-ı merkūm yedinde olan meblağ-ı mezkûrdan dahi hisse ahzetdirmem deyü müdde‘î-i merkūmun ber-vech-i muharrer verâsetini ve mazmûn-ı hüccet-i mezkûreyi külliyen inkâr etmekle müdde‘î-i merkūm ber-vech-i muharrer müdde‘âsını mazmûn-ı hüccet-i mezkûreyi her biri lede’t-tezkiye adl ve makbûlü’ş-şehâde idükleri ihbâr olunan zeyl-i hüccetde isimleri mezkûr ketebeden es-Seyyid el-hâc Abdullah Efendi b. Ahmed ve Çömlekçi Mehmed İzzet b. İbrahim nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince tereke-i müteveffâ-yı mezbûrdan keff-i yed ve makbûzundan hisse-i irsiyesini müdde‘î-i mezbûr Mehmed Ağa’ya teslîme merkūme Zeliha Hatun’a tenbîh ve vâki‘ olan müdâhalesi dahi men‘ olunduğu huzûr-ı âlîlerine i‘lâm olundu. El-emru li-men-lehü’l-emr.
Fî 19 Z sene [12]56.
|