Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 209 Hüküm no: 259 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Hatice bt. Musa ile kız kardeşi Ayşe’nin muhallefatı hususunda varislerin birbirlerinin zimmetlerini ibra ettikleri Mahrûse-i Galata muzâfâtından kasaba-i Beşiktaş’da Sinanpaşa mahallesi sâkinelerinden bundan akdem müteveffât olan Hadice bt. Musa nâm hatunun verâseti ancak li-ebeveyn kız karındaşı Âişe nâm hatuna münhasıra olup kable’l-kısme mezbûre Âişe dahi müteveffât olup verâseti sadrî kebîr oğlu Mehmed b. İbrahim nâm kimesne ile sadrî oğlu Ali nâm mecnûna ve sadriye kebîre kızları Emine ve Emetullah nâm hatunlara münhasıra olduğu şer‘an zâhir ve mütebeyyin oldukdan sonra mezbûr Mehmed ile merkūm Ali’nin tesviye-i umûru için kıbel-i şer‘den mansûb vasîsi olan Mehmed Bey b. [İbra]him nâm kimesneler mahfil-i kazâda müteveffiyetân-ı merkūmetânın muhallefâtlarına vâzı‘ateyi’l-yed olan işbu bâ‘iseteyi’l-kitâb mezbûretân Emine ve Emetullah mahzarlarında bi’l-asâle ve bi’l-vesâye herbiri ikrâr ve takrîr-i kelâm edüp müteveffiyetân-ı merkūmetânın terekeleri ba‘de’l-müzâyede fürûht olunup cem‘an üç bin dört yüz elli dokuz akçeye bâliğ olmağın meblağ-ı mezbûrdan sekiz yüz yirmi akçesini mukaddemâ müteveffât olan mezbûre Hadice’nin techîz ve tekfînine harc u sarf olunup ve dokuz yüz yetmiş akçesi sâniyyen müteveffât olan merkūme Âişe’nin techîz ve tekfînine harc u sarf olunup ve üç yüz iki akçe dahi dellâliyye ve hammâliyye ve kâtibiye ve mahkemeye harc u sarf olunup ve meblağ-ı bâkī bin üç yüz altmış yedi akçeden müteveffât-ı mezbûre Âişe’nin kasaba-i merkūme sâkinelerinden Niyazi bt. Abdullah nâm hatuna deyn-i müsbeti için dört yüz akçe ve Kasab Todori nâm zimmîye et bahâsından olan deyn-i müsbeti için seksen yedi akçe ve Mıgırdıç nâm Ermeniye tülbent bahâsından olan deyn-i müsbeti için yüz yirmi akçe ve bakkal tâifesinden Aznavur nâm Ermeniye bal ve yağ bahâsından olan deyn-i müsbeti için yüz kırk akçe ve Hasan nâm kimesneye otuz akçe ve Mehmed[‘in] anasına kırk akçe ve Şâtır Ahmed Çelebi[‘ye] dokuz akçe ve Mehmed Çelebi nâm kimesneye otuz sekiz akçe ki cem‘an sekiz yüz altmış dört akçe ba‘de’l-isbât [78b] ma‘rifetimiz ile meblağ-ı mezbûrdan ifrâz ve ashâbına îfâ olundukdan sonra bâkī beş yüz bir akçe kalmağın meblağ-ı mezbûr beş yüz bir akçeyi alâ-mâ-farazallâhu te‘âlâ beyne’l-verese taksîm olundukda “li’z-zekeri mislü hazzi’l-ünseyeyn” her recüle yüz altmış yedişer akçe isâbet etmeğin meblağ-ı mezbûr yüz altmış yedişer akçeyi asâlet ve vesâyetimiz hasebiyle mezbûretân Emine ve Emetullah yedlerinden ahz u kabz eyledik min-ba‘d müteveffiyetân-ı merkūmetânın muhallefâtlarından mezbûrâtların zimmetlerinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: İbrahim Beşe [b.] Abdullah, Mustafa b. Mehmed, huddâm-ı mahkeme, Cafer b. Mehmed, Hızır Efendi b. ( ) el-müderris, Mehmed b. Ramazan ve gayruhüm.